Azərbaycana dördgünlük səfər çərçivəsində Avropa Yenidənqurma və İnkişaf Bankının (AYİB) Direktorlar şurasının üzvləri bölgələrdə olublar. Bankın Bakı nümayəndəliyindən Trend ə verilən xəbərə görə, qonaqlar Mingəçevir, Şəki və Göyçayda olublar. Səfər oktyabrın 23-dən başlayıb.
Bu gün onlar həmçinin QHT, işgüzar dairələrlə görüşüb, sabahdan isə rəsmi hökümət nümayəndələri ilə görüşlər başlayır. AYİB-in şura üzvləri Azərbaycan prezidenti İlham Əliyev, baş nazir Artur Rəsizadə, iqtisadi inkişaf naziri və AYİB-də Azərbaycan tərəfdən idarə edən Heydər Babayev tərəfindən qəbul olunacaq, diplomatik korpusla görüşəcəklər.
Nümayəndə heyətinin tərkibinə AYİB-in direktorlar şurasında Macarıstan, Çexiya, Slovakiya və Xorvatiyadan nümayəndə Laslo Andor (Laszlo Andor), Danimarka, İrlandiya, Litva və keçmiş Yuqoslaviya respublikası Makedoniyadan İb Katnelson (İb Katznelson), Koreya, Astraliya, Yeni Zelandiya və Misirdən Pyu-il Kim (Byung- il Kim), Polşa, Bolqarıstan və Albaniyadan Kalin Mitrev (Kalin Mitrev), Finlyandiya Norveç və Latviyadan Karina Rautala (Kaarina Rautala), İsveçrə, Türkiyə, Lixtenşteyn, Özbəkistan, Qırğızıstan, Azərbaycan, Türkmənistan, Serbiya və Çernoqoriyadan Manuel Saqer (Manuel Sager), Sloveniya, Belçika və Lükskmburqdan İrena Sodin (İrena Sodin), ABŞ-dan Mark Sallivan (Mark Sullivan) daxildir.
Əməkdaşlıq etdiyi andan AYİB ölkədə 700 mln. avro məbləğində 300 investisiya layihəsini maliyyələşdirib. Bank güclü maliyyə sektorunun inkişafına yardım edir, özəl qeyri-neft sektorunda mikro, kiçik və orta biznesi dəstəkləyir.