Azərbaycanın nəqliyyat naziri Ziya Məmmədov Cənubi Koreyaya səfərə yola düşüb. Bu barədə Trend ə ölkənin Nəqliyyat Nazirliyindən məlumat verilib. Səfər zamanı nəqliyyat sahəsində və Bakı şəhərinin nəqliyyat infrastrukturunun yükünün azaldılması üçün avtobusların tədarükü məsələsində ikitərəfli əməkdaşlıq məsələlərinin müzakirəsi nəzərdə tutulur. Səfər noyabrın 12-dək davam edəcək.
Nazirlikdən bildirilib ki, avtobuslar fərdi sərnişin daşıyıcıları tərəfindən alınacaq. Nazirlik tənzimləyici funksiyanı yerinə yetirir. Bu isə Azərbaycanda sərnişin daşımaları üçün istifadə olunacaq avtomobillərin standartlarının müəyyən edilməsindən ibarətdir.
Almaniya, Koreya, Çin və digər istehsalçılar Azərbaycana iri tutumlu avtobusların çatdırılması təklifi ilə çıxış edib. Hazırda bu təkliflər iqtisadi cəhətdən qiymətləndirilir.
Həmin təkliflərdən ən sərfəlisi, Bakı küçələrinə münasib olanı seçiləcək. Birinci mərhələdə təxminən 200, gələcəkdə isə daha 500 bu cür avtobusun alınması nəzərdə tutulur.
Bu onunla izah edilir ki, aparılmış qiymətləndirmələrə əsasən, sərnişin daşınması və marşrutların təmin olunması üçün təxminən 800 iri tutumlu və 2 minədək orta tutumlu avtobus lazımdır.
Bu işlər Azərbaycan prezidentinin "2006-2007-ci illəordə Bakı şəhərində nəqliyyat sisteminin təkmilləşdirilməsi haqqında" fərmanı çərçivəsində həyata keçiriləcək. Yeni avtobusların alınması şəhərin nəqliyyat infrastrukturunda bir sıra problemləri həll etməyə, o cümlədən sərnişinlərə xidmətin keyfiyyətini artırmağa imkan verəcək.
