Noyabrın 23-də Zaqafqaziyadakı rus qoşunlarının Tiflis qarnizonunun Rusiyaya göndərilən əmlak və texnikasından ibarət növbəti eşelon Azərbaycana gələcək. Bu barədə Trend ə Azərbaycan Dövlət Dəmir Yolu İdarəsindən məlumat verilib. Eşelon ölkəni günorta tərk edəcək (Yalama sərhəd stansiyasında Rusiya tərəfinə veriləcək).
Eşelonla 8 ton əmlak və 23 ədəd texnika, o cümlədən 4 BTR, 2 BRD, bir neçə dartıcı və avtomobil texnikası yola salınıb. Noyabrın 16-da qrupun Tiflis qarnizonunun texnika və əmlakından ibarət eşelon Rusiyanın Ermənistandakı Gümrü hərbi bazasına göndərilib. Gələn həftə Azərbaycan ərazisindən Rusiya bazalarının texnikaları ilə yüklənmiş daha bir eşelonun keçəcəyi gözlənilir. Tiflis qarnizonundan cəmi 100 ədəd texnika, 350 ton əmlak və döyüş sursatı, o cümlədən 387 hərbi qulluqçu çıxarılır.
ADDYİ nümayəndələri qeyd edir ki, Rusiya tərəfi bu il respublika ərazisindən hərbi bazaların texnikaları ilə yüklənmiş 400 vaqonun keçəcəyi ilə bağlı ərizə verib. Ancaq daha sonra bunun sayının artırılması qərara alınıb. Vaqonların ölkə ərazisindən keçməsi MDB və Azərbaycanda qəbul olunmuş təhlükəsizlik qaydalarına uyğun həyata keçirilir.