2006-cı ilin yanvar-oktyabr aylarında Naxçıvan Muxtar Respublikasında nəqliyyat müəssisələri və fiziki şəxslər tərəfindən 5927,4 min ton yük və 36122,5 min sərnişin daşınıb. Bu barədə Trend ə NMR-in Bakıdakı daimi nümayəndəliyindən məlumat verilib. 2005-ci ilin həmin dövrü ilə müqayisədə yük daşımalarınnı həcmi 11,1%, sərnişin daşımalarının həcmi isə 8,3% artıb.
Göstərilmiş xidmətlərdən 20565,6 min manat məbləğində gəlir əldə olunub ki, bu da 2005-ci ilin analoji dövrü ilə müqayisədə 8,3% çoxdur.
Yük daşımalarının 99,5%-i (5899,5 min ton) və sərnişin daşımalarının 94,8%-i (34239,4 min nəfər), o cümlədən əldə olunmuş ümumi gəlirin 70%-i (14397,7 min manat) özəl sektor müəssisələrinin payına düşüb.
Yanvar-sentyabr aylarında NMR-də nəqliyyat sektoru işçilərinin sayı 1665 nəfər təşkil edib. Artım 3,4%-ə bərabər olub. Orta aylıq əmək haqqı 46,7% artaraq, 122,8 manata bərabər olub.
Dövlət Statistika Komitəsinin məlumatına görə, yanvar-oktyabr aylarında Azərbaycanın nəqliyyat sektoru 117,5 mln. ton müxtəlif yük daşımaları həyata keçirib. Bu, ötən ilin analoji dövrü ilə müqayisədə 13,1% çoxdur. Daşınmış yüklərin ümumi həcminin 57,8%-i özəl sektorun payına düşür.