Azərbaycan İnvestisiyaların və İxracın Təşviqi Fondu Himayəçilər Şurasının 7-ci iclasının təqribi tarixi dekabrın 21-nə təyin olunub. Trend in xəbər verdiyi kimi, AZPROMO-nun prezidenti Emil Məcidov bildirib ki, Şura üzvlərinin bütün yüksək vəzifəli şəxslərinin iclasda iştirak edə bilməsi üçün bu tarix 2007-ci il yanvarın 10-na da təyin oluna bilər.
E.Məcidovun sözlərinə görə, iclasın gündəliyinə 3 əsas məsələ - 2007-ci ilin fəaliyyət planı, yeni üzvlərin qəbulu və TACİS layihəsinin bağlanması məsələləri daxil edilib.
Artıq 12 namizəd Himayəçilər Şurasının üzvü olmaq niyyətindədir. Bu tarixədək onların sayının 15-ə çatacağı istisna olunmur. "Son vaxtlar AZPROMO sıralarına əsasən şirkətlər daxil olur. Ancaq namizədlər arasında indiyədək əlaqələrin qurulmadığı bir sıra holdinqlər də var", - deyə AZPROMO rəhbəri qeyd edib.
Hazırda Şuranın 74 üzvü var. Bunların 50-dən çoxunu şirkətlər təşkil edir.
Yeni əsasnaməyə görə, Şura ildə ən azı bir dəfə iclas keçirməlidir. Sonuncu iclas 28 iyun 2006-cı ildə keçirilib.
