2007-ci ildən etibarən "Azərbaycan İnvestisiya Şirkəti" SC (AİŞ) vəsait cəlb etmək və onların hesabına daha böyük layihələrdə iştirak etmək niyyətindədir. Trend xəbər verir ki, bu barədə AİŞ İcraçı direktorunun müavini Riad Qasımov məlumat verib.
Onun sözlərinə görə, vəsaitlərin istiqraz buraxılışı hesabına cəlb olunması nəzərdə tutulub. "Bir neçə il ərzində investisiya şirkətinin qarşısına avroistiqrazların buraxılışı ilə məşğul olmaq məqsədi qoyulub. Prinsip etibarilə, belə bir imkanımız var və gələn il kifayət qədər portfel yaratdıqdan sonra istiqraz buraxa və investorlarda onları almaq üçün maraq yarada bilərik", - deyə R.Qasımov qeyd edib. O hesab edir ki, artıq gələn ilin ikinci yarısından şirkətin portfelini qiymətləndirmək mümkün olacaq.
AİŞ Azərbaycan prezidentinin 30 mart 2006-cı il tarixli sərəncamı ilə qeyri-neft sektorunun inkişafı üçün sərmayə qoyuluşlarının təşviqi, bu sahədə fəaliyyət göstərən müəssisələrin maddi və texnoloji bazasının yenilənməsi məqsədilə yaradılıb. AİŞ-in nizamnamə kapitalı 90 mln. manatdır və Dövlət Neft Fondunun vəsaitləri hesabına formalaşır.
