2006-cı ilin yanvar-noyabr aylarında Azərbaycanda ÜDM ötən ilin analoji göstəricisi ilə müqayisədə 34,4% artıb. Dövlət Statistika Komitəsindən Trend ə verilən xəbərə görə, 1 dekabr 2006-cı il tarixində cari qiymətlərdə ÜDM göstəricisi 16329,4 mln. manat təşkil edib. Adambaşına düşən ÜDM həcmi 32,9% artaraq, 1953,2 manat (2181,4 ABŞ dolları) təşkil edib.
Ölkənin ÜDM-də istehsalın payı ötən ilin analoji dövrü ilə müqayisədə 44,6% artıb və 70,5% (11504,5 mln. manat) təşkil edib. Xidmət sahəsində əlavə dəyər ötən illə müqayisədə 16,3% artıb, ÜDM-də xüsusi çəki isə ötən ilin 27,3% göstəricisindən 22,9%-ə qədər azalıb.
Məhsullardan və idxaldan xalis vergi ÜDM-də 6,6% təşkil edib. Bu dövr ərzində sənayedə 9464,9 mln. manat həcmində ÜDM istehsal olunub, bu isə ümumi ÜDM-in 58%-ni təşkil edir, kənd təsərrüfatı, ovçuluq sektorunda və meşəçilikdə 821,8 mln. manat (5%), inşaat sektorunda - 1217,8 mln. manat (7,5%), nəqliyyat sektorunda - 1031 mln. manat (6,3%), rabitə sektorunda - 308,2 mln. manat (1,9%), topdan və pərakəndə satış, avtomobil, məişət məmulatları sahəsində və şəxsi istifadə əşyalarının təmiri üzrə xidmət sahəsində - 901,1 mln. manat (5,5%), restoran və mehmanxana sektorunda - 118,9 mln. manat (0,7%), sosial və digər xidmətlərin göstərilməsində - 1392,8 mln. manat (8,5%) əlavə dəyər istehsal olunub.
