Azərbaycan hökuməti ölkədə alüminium istehsalı üzrə zavodun tikintisi layihəsi çərçivəsində elektrik enerjisinin qiymətinin müəyyən müddət dəyişməz qalmasının mümkünlüyü barədə "Rus Alüminiumu" ASC-yə məlumat verib. Trend xəbər verir ki, bu barədə iqtisadi inkişaf naziri Heydər Babayev bildirib.
Nazir qeyd edib: "Bizim qərarımız belədir ki, şirkətin istədiyi güzəştlərin müqabilində biz yalnız bu təkliflə razılaşa bilərik".
"RusAl"ın şərtlərinə son cavabda İİN əvvəlki mövqeyinin üstündə qaldığını bir daha bildirib ki, ölkənin büdcəsinin xeyrinə olmayan bu cür investisiya yatırımları ölkənin maraqlarına ziddir. "RusAL"ın elektrik enerjisini iki dəfə ucuz qiymətə satılması ilə bağlı təklifi qəbul edilməyib.
Azərbaycanda yeni tikiləcək alüminium zavodunun gücü ildə 300 min ton təşkil edəcək. Zavodun işinin təmin edilməsi, infrastrukturun genişləndirilməsi və elektrik stansiyasının tikintisi üçün investisiyaların ümumi həcmi 1 mlrd. dolları keçəcək.
