Xarici İşlər Nazirliyi İqtisadi İnkişaf Nazirliyi ilə birgə Azərbaycanın Ümümdünya Ticarət Təşkilatına daxil olmasına hazırlıq üzrə Dövlət komissiyasının statusunun yüksəldilməsi üzrə təklifləri hökümətə təqdim edib. Bu barədə Trend ə xarici işlər nazirinin müavini Mahmud Məmmədquliyev məlumat verib.
Onlar dövlət komissiyasının statusunun gücləndirilməsini və yaxşılaşdırılmasını, bu prosesə cəlb olunmuş bütün qurumların komissiyanın sorğularına operativ şəkildə reaksiya vermələri üçün onun konkret öhdəlik və səlahiyyətlərlə qaldırılmasını, danışıqların daha intensiv aparılması üçün lazımi məlumatın təqdim edilməsini nəzərdə tuturlar.
Hazırda yeni struktur forması nəzərdən keçirilir və bunun prezident yanında Şura formasında olacağı istisna olunmur.
Bu gün ölkənin başlıca vəzifələrindən biri qanunvericiliyin ÜTT tələblərinə uyğun təkmilləşdirilməsidir və bu tədbirlərin 2007-ci ilin sonunadək başa çatması planlaşdırılır. İkinci vəzifə - mal və xidmətlər üzrə ikitərəfli danışıqların intensivləşdirilməsidir.
