"Quş qripi" xəbərdarlığı barədə növbəti monitorinqin keçirilmə vaxtı müəyyən olunub. Bu barədə cümə günü Trend ə Kənd Təsərrüfatı yanında Dövlət Baytarlıq xidmətindən məlumat veriblər.
Növbəti monitorinq yanvarın 15-dən başlayacaq və bir həftə davam edəcək. Bu, 2007-ci ildə ilk, 2006-cı ilin aprelindən bəri isə 8-ci monitorinq olacaq.
Tədbir əvvəllər olduğu kimi xüsusi komissiya tərəfindən keçiriləcək ki, komissiyanın tərkibinə baytarlıq xidmətilə yanaşı, Ekologiya və təbii sərvətlər, Səhiyyə nazirliklərinin, Ovçular cəmiyyətinin mütəxəssisləri daxil olacaq. Monitorinq köçəri quşların müvəqqəti yaşadığı Pirallahı adasında, Abşeron yarımadasında, Dəvəçidə, Salyanda, Ağcabədidə, Lənkəranda və Xəzər dənizi sahillərindəki milli parklarda keçiriləcək.
Keçiriləcək monitorinqin nəticələri yanvarın 16-da elan olunacaq. Baxmayaraq ki, 2006-cı ilin aprelindən bu günə qədər Azərbaycanda vəhşi quşlar arasında "quş qripi" virusu aşkar olunmayıb, ölkənin bütün sərhəd baytarlıq məntəqələri gücləndirilmiş rejimdə işləyir və virus yoluxması halları aşkar olunan ölkələrdən ölkəyə quş məhsullarının gətirilməsi, istifadəsi və vəhşi quşların satışı, ovlanması və istifadəsinə qoyulan qadağa hələ də qüvvədədir.
