Dağlıq Qarabağ münaqişəsi həll olunana və Azərbaycanın Ermənistan tərəfindən işğala məruz qalan torpaqları azad edilənə qədər "Alternativ hərbi xidmət haqqında" qanunun qəbul edilməsi mümkün deyil. Bu sözləri Trend ə açıqlamasında Azərbaycanın Avropa Şurası Parlament Assambleyasındakı (AŞ PA) nümayəndə heyətinin üzvü, deputat Gültəkin Hacıyeva bildirib.
Xatırladaq ki, ölkəmiz Avropa Şurasına daxil olan zaman öz üzərinə "Alternativ hərbi xidmət haqqında" qanun qəbul ediləcəyinə dair öhdəlik götürüb.
G.Hacıyevanın sözlərinə görə, nə qədər ki, Ermənistan işğal etdiyi əraziləri boşaltmayıb, Milli Məclis bu qanunun qəbulunu təxirə salacaq.
"Hesab edirəm ki, Azərbaycan reallıqlarını gözəl bilən və işğalcı Ermənistana bu günə qədər tolerant münasibət göstərən Avropa Şurası ölkəmizin bu mövqeyinə də eyni formada yanaşacaq", - deyə nümayəndə heyətinin üzvü vurğulayıb.
