Azərbaycan, Bakı/müxbir Trend İ.Xəlilova/Aprelin 16-dan 18-dək Latviyanın xarici işlər naziri Artis Pabriksin rəhbərlik etdiyi biznes nümayəndə heyətinin Azərbaycana səfəri gözlənilir. Bu barədə Latviyanın iqtisadiyyat naziri Yuris Strods məlumat verib. Biznes nümayəndə heyətinə bank, ağac emalı sənayesi, informasiya texnologiyaları, qida məhsulları istehsalı sahəsinin mütəxəssisləri daxil olacaq.
"Hazırda Azərbaycan və Latviyanın iş adamları arasında münasibətlər geniş deyil, lakin son iki ilin tendensiyası göstərir ki, ölkələr arasında əlaqələr artan xəttlə inkişaf edir. Bu tendensiyanı itirməmək üçün istərdik ki, artıq aprel ayında Latviyanın sahibkarlar qrupu Azərbaycana gəlsin. Çox ümid edirik ki, Azərbaycan sahibkarları da həmçinin əməkdaşlıqda maraqlanaraq Latviyaya səfər edəcək və bu da yerlərdə şəraitlə tanış olmağa imkan yaradacaq", deyə nazir qeyd edib.
Onun sözlərinə görə, Latviya SSRİ dövlət standartlarından Avropa Birliyi (AB) standartlarına keçməkdə unikal təcrübəyə malikdir. "Əgər Azərbaycanın iş adamları AB ilə ticarət ələaqələrinin qurulmasında maraqlıdırlarsa, Latviya kimi dövlətin təcrübəsindən yararlanmaq daha asan olacaq. Belə ki, keçmişimiz praktik olaraq eynidir. Bizdə bu sistemə keçid 2002-ci ildən başlayaraq 2006-cı ilin ortasına qədər davam edib. Artıq 10-15 ildən sonra hər şey unudulacaq", deyə Y.Strods bildirib.
