Azərbaycan, Bakı /müx. Trend İ.Xəlilova/ 2007-ci il 1 aprel üçün Vergilər Nazirliyinin xüsusi vergi rejimili müəssisə və iri vergi ödəyicilərilə iş üzrə Departamentinin xətti üzrə vergi borclarının həcmi 11,6 faiz azalaraq 586,6 milyon manata çatıb. Bu barədə ilin birinci rübünə həsr olunan müşavirədə sözügedən departamentin rəis müavini Elçin İsayev məlumat verib. Halbuki ilin əvvəlində bu göstərici 663,8 milyon manat təşkil edirdi. Birinci rübdə "Azərenerji" və "Azəriqaz" ARDNŞ-dən aldığı yanacağa görə ödəmələri tam həyata keçirmədiyi üçün ARDNŞ proqnoz göstəriciləri 79 faiz yerinə yetirib. Yəni o büdcəyə gözlənilən 238,9 milyon manat əvəzinə 188,7 milyon manat vergi ödəyib.
ARDNŞ istisna olmaqla 9 iri vergi ödəyicisi dövlət büdcəsinə 52,3 milyon manat köçürüb, bununla da proqnoz 119 faiz icra olunub. Bunlardan Rabitə və İnformasiya Texnologiyaları Nazirliyi vergi proqnozunu 22,3 faiz, Xəzər Gəmiçiliyi -16,1 faiz, "Azərkimya"-54 faiz, Bakı Metropoliteni - 8,7 faiz az yerinə yetirib. Digər dövlət təşkilatları isə vergi ödəmələrini tam icra edib. Belə ki, "Azərenerji" 149,8 faiz, Azərbaycan Dövlət Dəmir Yolu 109,3 faiz, "AzAL" 113,2 faiz, "Azəriqaz" 117,3 faiz, "Azərsu" 142,7 faiz ödəmələr həyata keçirib.
