Azərbaycan, Bakı/ Trend müxbir U.İsmayılova/ Hasilat sənayesində şəffaflıq təşəbbüsünün (EITI) prinsipləri qızıl və dəmir filizi çıxarılması sahəsində tətbiq olunacaq. Bunu cümə axşamı İqtisadi Araşdırmalar Mərkəzinin rəhbəri Qubad İbadoğlu bildirib.
İbadoğlunun sözlərinə görə, EITI fəaliyyətinin genişləndirilməsi layihəsinin məqsədi şəffaflığa nail olmaq, hasilat sənayesində korrupsiyanı azaltmaq, təbii ehtiyatların rasional istifadəsi üzərində ictimai nəzarəti gücləndirməkdir.
"Strateji planın həyata keçirilməsi üzrə beynəlxalq təşkilatlarla danışıqlar aparılır",-deyə o söyləyib.
25 yanvar EITI təşəbbüsü üzrə qeyri-hökumət təşkilatları ittifaqının sədri vəzifəsindən öz ərizəsilə getmiş Sabit Bağırovun əvəzinə İqtisadi Araşdırmalar Mərkəzinin rəhbəri və "Ekspert" jurnalının baş redaktoru Qubad İbadoğlu təyin olunub.
