Azərbaycan,Bakı/müxbir Trend İ.Xəlilova/Fransanın BNP Paribas bankı və Azərbaycanın Nəqliyyat Nazirliyi arasında Hacıqabuldan Gürcüstan sərhədinə qədər olan avtomagistralın iki zolaqlıdan dörd zolaqlıya qədər genişləndirilməsi layihəsi çərçivəsində kredit sazişi üzrə danışıqların birinci mərhələsi başa çatıb. Bu barədə çərşənbə günü nazirlikdən məlumat verilib. Bank kreditin əvvəl elan olunmuş 300 mln. dollardan 400 mln. dollaradək artırılması barədə bəyan edib.
Kredit resursları 4 güzəştli illə 14 il müddətinə libor+1,85 faizlə nəzərdə tutulur. Nazirlikdə hesab edirlər ki, bankla danışıqlar bu şərtlərin yüngülləşdirilməsinə qədər davam etdiriləcək.
Bakıda aparılmış danışıqların yekunlarına əsasən, görüşdə iştirak edən müxtəlif nazirlik və idarələ nümayəndələrinin imzaladığı protokol tərtib olunub. Bu yaxınlarda protokol ölkənin Nazirlər Kabinetinə təqdim olunacaq.
BNP Paribas-ın vəsaitləri Hacıqabuldan Yevlaxa qədər 184,8 km və Qazaxdan Gürcüstan sərhədinə qədər olan 38 km-lik yol sahələrinin maliyyələşdirilməsinə istiqamətləndiriləcək. Nazirlik TACİS-in texniki dəstəyi çərçivəsində hazırlanmış texniki sənədləşdirmə əsasında texniki-iqtisadi əsaslandırmanı yekunlaşdırıb. Hacıqabula qədər öncədən dörd zolaqlı yol çəkilib. Buna görə də magistralın qalan hissəsinin ona uyğunlaşdırılması planlaşdırılır.