Azərbaycan,Bakı/müxbir Trend İ.Xəlilova / Azərbaycanın İxrac və İnvestisiyaların Təşviqi Fondu (AZPROMO) Azərbaycan investisiya imkanlarının təqdimatı məqsədilə Los-Ancelesə səfər müddətini dəqiqləşdirib. AZPROMO-nun investisiyaların təşviqi üzrə direktoru Anar Quliyevin məlumatına əsasən, səfər 30-31 may tarixdə baş tutacaq.
Azərbaycan nümayəndə heyətinə iqtisadi inkişaf nazirinin müavini Mikail Cabbarovun başçılıq edəcəyi gözlənilir. Nümayəndə heyətinin tərkibinə həmçinin 15 şirkət nümayəndəsi daxil olacaq. "Bu günə qədər müxtəlif sahələr - informasiya texnologiyaları, bəzi bank strukturları, mühəndislik, tikinti şirkətləri, istehsal sahələrindən olan şirkətlər maraq göstərib. İş adamlarından ibarət qrup hələ formalaşdırılma mərhələsindədir" - deyə Quliyev məlumat verib.
Səfər İqtisadi İnkişaf Nazirliyi və AZPROMO tərəfindən təşkil olunub.
Amerika-Azərbaycan ticarət-sənaye palatası öz növbəsində 21-26 may tarixdə Amerikanın qida sənayesi və kənd təsərrüfatı üzrə ixtisaslaşmış lider şirkətlərinin Bakıya səfərini təşkil edəcək. Missiya Azərbaycanın qida və kənd təsərrüfatı müəssisələrinə baş çəkəcək, hökumətin bu sahədən olan nümayəndələri, həmçinin kənd təsərrüfatı və iqtisadi inkişaf nazirləri ilə görüşəcək.
Ticarət-sənaye palatası həmçinin 13-cü "Inter Food Azerbaijan-2007" sərgisi çərçivəsində 23-25 may tarixdə Bakıda keçiriləcək Amerika-Azərbaycan kənd təsərrüfatı üzrə biznes forumun sponsoru qismində çıxış edəcək.
