Azərbaycan, Bakı/müxbir Trend İ.Xəlilova, S.Babayeva/ Dünya Bankı (DB) Azərbaycan hökumətinə Azərbaycan dəmir yolunun miqyaslı restrukturizasiyasını tövsiyə edib. Bu barədə cümə günü DB-nin Bakı nümayəndəliyinin rəhbəri Qreqori Yedjeyçak məlumat verib.
"Biz, Azərbaycana müxtəlif variantlar təqdim etmişik, lakin hökumət ilk öncə inkişaf planını özü müzakirə etməlidir və qərarını verməlidir. Müxtəlif alternativ versiyalar mövcuddur və hökumətə ən yaxşı xarici təcrübəni seçmək lazımdır", deyə Yedjeyçak bildirib.
DB nümayəndəliyi rəhbərinin sözlərinə görə, ADDY-nin restrukturizasiyası çərçivəsində institusional inkişaf, avadanlıq və relslərin dəyişdirilməsi nəzərdə tutulur.
DB-nin ölkənin dəmir yolunun yenidən təşkili üzrə tövsiyələri dəmir yolu vasitəsilə nəqletmə və ticarətə yardım layihəsi çərçivəsində təklif olunub.
Birinci variantda bank tərəfindən dizellə işləyən lokomotivlərin alınması nəzərdə tutulur. İkinci variantda dəyişən cərəyanlı elektrik lokomotivlər təklif olunub, bu da Azərbaycan tərəfindən dəstəklənib. Ölkə hökumətinin niyyətlərinə Azərbaycan dəmir yollarının sürətinin inkişaf etdirilməsinin daxil olduğunu nəzərə alaraq, birinci variant artıq məqsədəuyğun hesab olunmur.
Variantlardan asılı olaraq investisiyaların həcmi də dəyişir. Birinci variant 600 mln. dollar, ikinci variant isə 760 mln. dollar dəyərində qiymətləndirilir. Lokomotivlərin əldə olunması ilə yanaşı layihə dəmir yolunun ümumi yenidən qurulmasını, strukturun yenidən formalaşdırılmasını da nəzərdə tutur.
Nəqliyyat Nazirliyi nümayəndələrinin fikrinə görə, layihənin maliyyələşdirilməsi beynəlxalq maliyyə institutlarının kreditləri, dövlət büdcəsi vəsaitləri və ADDY-nin öz vəsaitləri ilə kombinə oluna bilər.
DB-nin Azərbaycan hökuməti ilə əməkdaşlıq strategiyasına (2007-10-cu illər) əsasən, dəmir yolu vasitəsilə nəqletmə və ticarətə yardım layihəsinə 80 mln. dolların ayrılması planlaşdırılır, lakin bank kredit məbləğinin artırılması mümkünlüyünü istisna etmir, belə ki, BYİB-in vəsaitləri məhdud deyil.
