Azərbaycan, Bakı/ Trend müxbir İ.Xəlilova/ Azərbaycan Milli Bankı yanında fəaliyyət göstərən Azərbaycan İpoteka Fondu (AİF) ipoteka kreditləşməsinin şərtlərinin dəyişdirilməsi ilə bağlı hökumətə təkliflər vermək niyyətindədir. Bu barədə cümə axşamı AİF icraçı direktoru Faiq Məmmədov məlumat verib. AMB artıq sosial ipoteka ilə kommersiya ipotekasının ayrılmasını təklif edib. Kommersiya əsaslı ipotekada bazar şərtlərinin tətbiq olunması nəzərdə tutulur.
"Dünya təcrübəsi, həmçinin Qazaxıstan təcrübəsinə müvafiq olaraq ipoteka kreditləşməsinin davam etdirilməsi üçün sosial ipoteka istisna olmaqla bu alət bazar şərtlərinə əsaslanmalıdır",-deyə Məmmədov bildirib.
İpoteka fondunun gələcəkdə əlavə vəsaitlərin cəlb olunması üçün xarici bazara çıxması, qiymətli kağızlar buraxması nəzərə alınaraq AİF-in təkliflərində həmçinin fondun institusional strukturunun təkmilləşdirilməsi də nəzərdə tutulur. Hökumət tərəfindən maliyyələşdirilən ipoteka kreditləşməsi əhalinin aztəminatlı hissələri üçün nəzərdə tutulmalıdır.
Xarici investorları əlverişli şərtlərlə maraqlandırıaraq cəlb etmək olar. Digər ölkələrdə də olduğu kimi, əsas meyarlar inflyasiyanın artım tempi, mərkəzi banklar, maliyyə nazirliklərinnin emissiya etdikləri qiymətli kağızlar üzrə dərəcələrdir.
"Bu, Ipoteka Fondu tərəfindən öz qiymətli kağızlarının buraxılması üçün əsas şərtdir. Bununla əlaqədar olaraq ipoteka kreditləri üzrə faiz dərəcələrini artırmaq lazımdır ki, bu da gələcəkdə əlavə vəsaitlərin cəlb olunmasına imkan verəcək",-deyə Məmmədov bildirib.
Onun sözlərinə görə, ilkin mərhələdə AİF qiymətli kağızlarının orta müddətli dövr üçün buraxılması nəzərdə tutulur. Bundan dövlətin xüsusi proqramları üzrə ayrı-ayrı kateqoriyalar da daha əlverişli şərtlərlə istifadə edə biləcəklər.
Ipoteka kreditləşməsinin şərtlərinin dəyişdirilməsi prezident fərmanına uyğun olaraq nəzərdə tutulur.
