Azərbaycan, Bakı/ Trend müxbir İ.Xəlilova/ Fransanın "BNP Paribas" bankı Hacıqabuldan Gürcüstan sərhədinədək avtomagistralın iki zolaqlı yoldan 4 zolaqlı yola genişləndirilməsi layihəsi üçün kredit şərtlərinin yumşaldılması üzrə Azərbaycan hökuməti ilə danışıqlarda fasiləni saxlamaqda davam edir. Şənbə günü Nəqliyyat Nazirliyindən verilən məlumata görə, onlar danışıqları yalnız sentyabrın sonu-oktyabrın əvvəlində davam etdirmək niyyətindədirlər.
Bank nümayəndələri iyun ayında Bakıya səfərdən sonra bir həftə müddətində öz qərarları barədə məlumat verəcəklərini söyləsələr də, hələ ki "BNP Paribas"ın rəsmi mövqeyi bildirilməyib.
Azərbaycanın Maliyyə Nazirliyi kredit üzrə faiz dərəcəsinin illik libor+0,75 faizdən 0,75 faizə salınmasında israr edir. Nəqliyyat Nazirliyində hesab edirlər ki, Fransız bankı bu təklifi qəbul edəcək. Belə ki, kredit üzrə risklər iyun görüşündə iştirak edən İsrailin "ASHRA" sığorta korporasiyası tərəfindən sığortalanacaq.
Hacıqabuldan Gürcüstan sərhədinə qədər yolun genişləndirilməsi üşün Fransız bankı 4-5 il ödəmə möhləti ilə 20 il müddətinə 400 mln. dollar ayırmağa hazır olduğunu bildirib. Nazirlikdə ilin sonuna qədər kredit razılaşmasının mümkünlüyü barədə bildiriblər.
