Azərbaycan, Bakı/ Trend müxbir İ.Xəlilova/ Asiya İnkişaf Bankı (AİB) Çinin Sənaye -ticarət palatası ilə birgə sentyabrın 24-28-nə qədər Mərkəzi Asiya və Qafqazdakı sənaye-ticarət palatalarının əməkdaşlığı və qarşılıqlı fəaliyyəti üzrə seminar təşkil edəcək. Bu barədə çərşənbə axşamı AİB-in Bakı nümayəndəliyindən məlumat verilib. Tədbir Mərkəzi Asiya rehgional iqtisadi əməkdalıq üzrə AİB proqramı (CAREC) çərçivəsində həyata keçirilir.
Seminar zamanı informasiya mübadiləsi aparılacaq, Asiya bankında təmsil olunan hər bir ölkənin investisya mühütinin vəziyyəti, bu ölkələr arasında əməkdaşlığın qurulması məsələləri müzakirə olunacaq.
Azərbaycandan tədbirdə iştirak üçün Azərbaycan İnvestisya Şirkəti, Ticarət-Sənaye palatası, Azərbaycan Milli Sahibkarlar Konfederasiyası və Azərbaycan və Türkiyə işadamları Birliyinə dəvət göndərilib. Nümayəndəlikdən bildiriblər ki, bu qurumlar tərəfindən isə seminarda iştirak niyyəti barədə hələ ki məlumat alınmayıb.
CAREC - səkkiz iştirakçı ölkə (Azərbaycan, Əfqanıstan, Çin, Qazaxıstan, Qırğızıstan, Monqolustan, Tacikistan və Özbəkistan) və altı beynəlxalq maliyyə institutunun (AİB, AYİB, BVF, İslam İnkişaf Bankı, BMT-nin İnkişaf Proqramı və Dünya Bankı) əməkdaşlığıdır.
Proqram infrastruktur layihələrinin maliyyələşdirilməsi və nəqliyyat, ticarətə yardım, ticarət siyasəti və energetika kimi prioritet sahələrdə regional siyasətin yaxşılaşdırılmasına yönəldilib. Üç illik dövr ərzində 2006-2008-ci illərdə CAREC altı beynəlxalq maliyyə təşkilatı iştiralkçı ölkələrə prioritet sahələrdə regional investisiyalar üçün 2,3 mlrd. dollar dəyərində vəsait ayırmağı planlaşdırır.