Azərbaycan, Bakı/ Trend müxbir İ.Xəlilova/ "Azərbaycan İnvestisiya Şirkəti" ASC (AİŞ) Ədliyyə Nazirliyində "Azərbaycan duzu" istehsalat birliyi" QSC-nin qeydiyyatdan keçməsini gözləyir. Bu barədə bazar ertəsi AİŞ icraçı direktoru Anar Axundov bildirib.
"Qeydiyyatdan sonra müəssisədə Avropa istehsalı olan avadanlıqların alınaraq quraşdırılmasına başlanacaq",- deyə Axundov söyləyib.
Onun fikrincə QSC ən geci bir ilə fəaliyyətə başlaya bilər.
İnvestisiya layihəsinin əsas məqsədi Masazırda yodlaşdırılmış və narın məişət duzu istehsal edən zavodun tikilməsidir. Duz Masazır gölü ətrafında yerləşən sahələrdən yığılacaq, həmçinin Türkmənistandan da tədarük olunması nəzərdə tutulub.
Yod çatışmazlığı probleminin aktuallığını UNICEF-in donorluğu ilə həyata keçirilən "Yod və yodlaşdırılmış universal duz çatışmazlığı" layihəsinin nəticələri də göstərib.
AİŞ-in bu layihədə iştirakı ilə bağlı investisya qərarı artıq qəbul olunub. Investisya şirkəti layihəyə 2.9 mln. dollar sərmayə qoymaq niyyətindədir və "Azərbaycan duzu"nun 25 faizinə sahib olacaq.
Zavodda gündəlik 100 ton yodlaşdırılmış məişət duzunun istehsal olunması planlaşdırılır ki illik istehsal da 30 min təşkil edəcək.