Azərbaycan, Bakı, 13 may / Trend / Cari ilin aprel ayında BP-nin operatoru olduğu "Azəri-Çıraq-Günəşli" yataqlarında orta sutkalıq neft hasilatı 775 min barel təşkil edib. Bu barədə şirkətdən bildiriblər.
Hasilatın ümumi orta sutkalıq həcmindən 125 min barel "Çıraq" yatağının, 650 min barel isə "Azəri" yatağının qərb, şərq və mərkəzi hissələrinin payına düşüb.
Cari il aprel ayının sonunda şirkət "Günəşli" yatağının dərin sulu hissəsində hasilata başlayıb, lakin həcmin az olması səbəbindən (Hasilata aprelin sonunda başlanıb) bu, yataqlarda orta sutkalıq neft hasilatı həcminə hələ ki, əhəmiyyətli dərəcədə təsir etməyib.
İlin sonuna qədər şirkət sutkalıq neft hasilatını 1 mln. barelə qədər çatdırmaq niyyətindədir.