Azərbaycan, Bakı, 10 iyun / Trend , müxbir S.Babayeva/ Cari ilin yanvar-may aylarında "Azneftkimyamash" ASC istehsalı 34,6 faiz artırıb. Bu barədə çərşənbə axşamı ASC-nin baş iqtisadçısı Nəriman Böyükkişi bildirib.
"Artım istehsalın gücləndirilməsi hesabına mümkün olub", - deyə o bildirib.
Onun sözlərinə görə, beş ay ərzində 11,1 mln. manatlıq neft- mədən, geoloji kəşfiyyat avadanlıqları, alətlər və onlara ehtiyat hissələri istehsal olunub. 13,5 mln. manatlıq məhsul reallaşdırılıb ki, bu da təxminən 2007-ci ilin yanvar-may aylarının göstəricilərinə nisbətdə 50 faiz çoxdur.
Bu dövr ərzində Zabrat maşınqayırma zavodu 2,3 mln. manat, Suraxanı maşınqayırma zavodu 2,1 mln. manat, "Bakı fəhləsi" zavodu 1,7 mln. manat, Sabunçu EİB 1,3 mln. manat, Bakı neftmədən maşınqayırma zavodu 1,7 mln. manat, Sərdarov adına zavod 1,2 mln. manat, Bakı maşınqayırma zavodu 1 mln. manat, Səttərxan adına zavod 1,1 mln. manat həcmində məhsul istehsal edib.
Cari ildə təşkilat 33,5 mln. manatlıq istehsal proqnozlaşdırır.
"Azneftkimyamash" ASC Respublika prezidentinin 2001-ciil 22 mart tarixli sərəncamı ilə "Azneftkimyamash" DŞ-nin bazasında yaradılıb. ASC-nin tərkibinə 14 maşınqayırma zavodu, 4 elmi-tədqiqat və layihə-konstruktor institutu daxildir.
Məqalə müəllifi ilə əlaqə ünvanı: capital
