Azərbaycan, Bakı, 14 iyul/ Trend / Azərbaycan Dövlət Neft Şirkətinin Geologiya və Geofizika İdarəsi tərəfindən 2007-ci ildə 217,3 kvadratmetr sahədə (104,9 kv. m "Azneft" İstehsalat Birliyi, qalan 112,44 kv. m isə, "Qobustan" əcnəbi əməliyyat şirkətinin payına düşür) üçölçülü seysmik tədqiqatlar aparılıb. Bu barədə şirkətin 2007-ci ilin yekunları üzrə hesabatında deyilir.
916 km-də ( 301,1 km "Azneft"in, 614,9 km xarici şirkətlərin - "Kura Valley" və "Karasu" şirkətlərinin payına düşür) ikiölçülü seysmik tədqiqatlar aparılıb. Həmçinin ,114 quyuda mikroseysmik karotaj aparılıb.
"Azneft" İB-nin obyektləri üzrə tədqiqatlar Muradxanlı, Cəfərli və Bəyimdağ-Tək çay sahələrində, xarici şirkətlər üzrə isə "Qobustan" ƏŞ üçün Kənizədağ, Şərqi Duvannı və Qobustan sahələrində, "Kura Valley", "Qarasu" ƏŞ-ləri üçün Böyük Hərami, Kiçik Hərami, İncəbel, Padar və Kəlaməddin sahələrində aparılıb.
2007-ci ildə yerinə yetirilmiş quyu geofiziki tədqiqat işləri nəticəsində, 240 layın qiymətləndirilməsi aparılıb. Bunlardan müsbət xarakteristikalı 196 laydan neft, mənfi xarakteristikalı 43 laydan su, qeyri-müəyyən xarakteristikalı 1 laydan neft
alınıb.
Ötən il mühəndis-geoloji işlər çərçivəsində 230349 metr, o cümlədən 772 metr kəşfiyyat - qazma, 4429 metr istismar- qazma, 12058 metr struktur- xəritəalma və mühəndisi-geoloji qazma, 3089,92 metr müfəssəl-geoloji qazma (o cümlədən xaricdə 1379 metr) həyata keçirilib.
Bulla-dəniz, Qoşadağ-Ağburun sahələrində qazma işləri aparılıb. Ötən il ARDNŞ -nin "Kompleks Geoloji Kəşfiyyat və Topoqrafiya İdarəsi" "Morincgeologiya" şirkəti ilə birlikdə Xəzər dənizinin Rusiya sektorunda 196 metr, Türkmənistan sektorunda 1320 metr müfəssəl mühəndisi-geoloji qazma işləri aparıb.
"Qərbi Abşeron" və "Pirallahı" yataqlarında, "Cahandar" sahəsində,həmçinin, Abşeron yarımadasının "Hövsan-Türkan" sahəsində axtarış-kəşfiyyat işləri aparılıb.
Axtarış- kəşfiyyat işləri çərçivəsində 2007-ci ildə 5142 m qazılıb ki, bu da planlaşdırılandan ( 4650 m) 10,6 faiz çoxdur. Görülən işlərin nəticəsində neft ehtiyatı 0,661 mln. ton, qaz 6,117 mlrd. kubmetr və kondensat ehtiyatı 0,605 mln. ton artırılıb.
