Azərbaycan, Bakı, 25 iyul/ Trend , müxbir A.Bədəlova/ Türkiyə və Rusiyanın ən iri inhisarçısı "Qazprom" arasında qaz sahəsində əməkdaşlığın möhkəmlənməsi "Nabukko" qaz kəmərinin tikinti layihəsinin reallaşdırılmasına güclü təsir etməyəcək. Trend -ın cümə günü sorğu apardığı ekspertlər belə hesab edirlər.
Reuters-in Türkiyə hökumətindəki mənbələrə istinadən yazdığına görə, "Qazrpom"un İdarə Heyətinin sədr müavini Aleksandr Medvedyevin Ankaraya səfəri zamanı tərəflər arasında qaz sahəsində bir sıra razılıqlar əldə edilib, xüsusilə də onlar tərəfindən ölkədə qazpaylayıcı şəbəkələrlə məşğul olacaq BM yaratmaq barədə qərar qəbul edilib.
Beynəlxalq Maliyyə Qrupu UniCredit Group-un bir hissəsi olan "YuniKredit Aton" şirkətinin analitiki Pavel Sorokin hesab edir ki, "Qazprom" və Türkiyə arasında əməkdaşlığın möhkəmlənməsi "Nabukko" layihəsinə güclü təsir etməyəcək.
"Bu layihənin perspektivləri "Qazprom"un Mərkəzi Asiya qazını bazar qiymətləri ilə almaq barədə razılığıdan sonra dumanlı olub", - Sorokin elektron poçtla Trend -a bildirib.
2009 - cu ildə "Qazprom" Mərkəzi Asiya ölkələrindən qazı iki dəfə baha qiymətə alacaq. Hazırda "Qazprom" üçün türkmən qazının qiyməti min kubmetrinə görə $150, Qazaxıstan qazının- $160, özbək qazının qiyməti isə $145 təşkil edir.
"AntantPioqlobal" İnvestisiya Qrupunun analitiki Timur Xayrulin hesab edir ki, "Nabukko" layihəsinin perspektivləri Qazrpom və Türkiyə arasında birgə layihələrin reallaşdırılmasından, "demək olar ki, asılı deyil".
Dəyəri $12,4 mlrd. olan "Nabukko" qaz kəməri ilə 2013 - cü ildən Azərbaycan və Mərkəzi Asiyadan Aİ ölkələrinə qaz tədarükü nəzərdə tutulur. "Nabukko" layihəsinin iştirakçıları Avstriyanın OMV, Macarıstanın MOL, Bolqarıstanın Bulgargaz, Rumıniyanın Transgaz, Türkiyənin Botas və Almaniyanın RWE şirkətləridir. İştirakçılardan hər biri bərabər paya - 16,67 faiz paya malikdir.
Əməkdaşlığın özünə gəldikdə isə, analitiklərin rəyinə görə, bu hər iki tərəfə faydalıdır.
"Qazpromun Türkiyə ilə əməkdaşlığı həm uğurlu, həm də problemli uzun tarixə malikdir. Rusiya və Türkiyənin iri birgə layihəsi "Mavi axın" olub. İndi isə tərəflər qazın saxlanılması və paylanılmasında qarşılıqlı fəaliyyət göstərmək niyyətindədirlər", - Xayrulin elektron poçtla Trend -a bildirib.
Sorokinin sözlərinə görə, "Qazprom" istehlakçılara yaxınlaşmaq üzrə siyasətini reallaşdırmağa davam edir.
"Əməkdaşlıq hər iki tərəfə faydalıdır; "Qazprom" paylama bazarına birbaşa çıxış və BM-in mənfəətinin bölünməsində iştirak imkanı əldə edir. Türkiyə isə, daxili bazara etibarlı qaz tədarükçüsü qazanır", - Sorokin yazır.
Müəlliflə əlaqə saxlamaq üçün elektron ünvan: [email protected]