Azərbaycan, Bakı, 12 avqust/ Trend , müxbir E.İsmayılov/ Azərbaycan Dövlət Neft Şirkətinə məxsus Kulevidəki (Gürcüstan) Qara dəniz neft terminalından neft və neft məhsullarının yüklənilməsi bərpa olunub, - çərşənbə axşamı Dövlət Neft Şirkətindən (ARDNŞ) məlumat veriblər. Terminalın işi normal rejimdə həyata keçirilir.
"Terminalın işi bərpa olunub, hazırda o normal rejimdə işləyir", - ARDNŞ - dən bildiriblər.
Azərbaycan bu terminal istiqamətində ARDNŞ-nin dünya bazarlarında realizə etdiyi mazut və dizel yanacağını nəql edir.
Kulevi terminalı eyni vaxtda 168 sistern-vaqonu qəbul edə bilər. Terminalın ümumi aşırma gücü 2 mln. ton xam neft, 3 mln. ton dizel yanacağı, 4 mln. ton mazut daxil olmaqla, ildə 10 mln. maye neft məhsulları təşkil edir. Terminalın çən parkının ümumi tutumu 320 min kubmetrdir. Terminalın illik gücünü 15- 20 mln. tonadək artırmaq, çən parkını isə, 380 min kubmetrədək genişləndirmək planlaşdırılır.
ARDNŞ terminalın tikintisini başa çatdırmaq üçün $305 mln. məbləğdə sindikatlaşdırılmış kredit götürüb. Kreditor qismində ABN Amro, Societe Generale və BNP Paribas-ın başçılığı ilə 15 Avropa bankı çıxış edib. ARDNŞ neftin yüksək qiymətləri və hasilatın artması ilə əlaqədar, 2009 - cu ilədək borcu tamamilə ödəmək niyyətindədir.
Terminal dörd dəmir yoluna, yanaşma kanalı və üç körpüyə malikdir. Terminalın strukturuna neft və neft məhsullarının keyfiyyətinin yoxlanılması üzrə laboratoriya, qazın yüklənilməsi üçün xüsusi estakadalar, həmçinin doqquz yardımçı servis gəmisindən ibarət mobil donanma, yeni, 13,8 kilometr uzunluğunda "Kolxeti-Kulevi" dəmir yolu xətti daxildir. Hesablamalara əsasən, terminal 100 mindən 150 min tonadək dedveytli gəmiləri sərbəst qəbul edə bilər.
Müəlliflə əlaqə saxlamaq üçün elektron ünvan - [email protected]