Azərbaycan, Bakı, 08 noyabr/ Trend / "Nabucco gas pipeline Int."in səhmdarları "Nabukko" qaz kəmərinin tikintisinə təqribən 2,37 mlrd. avro (layihənin ümumi dəyərinin 30 faizi) yatıracaq. Bu barədə şirkətin məlumatında bildirilir.
Layihə dəyərinin qalan 70 faizi kreditlər hesabına ödənəcək. Borcların üçdə biri Avropa Yenidənqurma və İnkişaf Bankı kimi beynəlxalq maliyyə institutlarının payına düşəcək. Dəyərin hansısa hissəsi tədarükçü ölkələrdə ixrac əməliyyatlarını dəstəkləyən agentlik və banklar tərəfindən ödənəcək. "Nabucco gas pipeline Int."in məlumatında bildirilir ki, qalan hissə kommerasiya maliyyə institutlrının payına düşəcək.
Sənəddə qeyd olunur ki, "Nabucco gas pipeline Int" yalnız tikinti və layihənin inkişafına cavabdehdir. "Avropa qanunvericiliyinə görə, "Nabucco gas pipeline Int." qaz alışı və ya satışı ilə məşğul olmayacaq. Bununla bizim nəqliyyat müştərilərimiz məşğul olacaq, hansı mənbə ilə (Qaz tədarükü mənbəsi ilə) işləyəcəklərini özləri müəyyən edəcəklər", - şirkətin məlumatında bildirilir.
Şirkətdən əvvəllər verilən məlumata görə, 2020 - ci ildə bu karbohidrogen xammalına tələbatın ödənilməsi üçün Avropaya Xəzər regionu və Yaxın Şərqdən tədarük olunacaq ildə 30 mlrd. kubmetrədək qaz lazım olacaq.
"Nabukko" qaz kəmərinin tikintisi üzrə birinci faza 2010 - cu ildə başlanacaq. Faza Türkiyə və Avstriya arasında 2000 km. uzunluğunda boru kəmərinin tikintisini özündə birləşdirir. Daha sonra iki il ərzində Türkiyə - Gürcüstan və Türkiyə - İran sərhədlərində yerləşən boru kəmərləri işə salınacaq. Bu, ilkin nəql gücü ildə 8 mlrd. kubmetr qaz təşkil edən boru kəmərini 2013 - cü ildə istifadəyə verməyə imkan verəcək.
"Nabukko"nun tikintisi üzrə ikinci faza 2014 - cü ilədək start götürəcək. Bu faza Türkiyə -Gürcüstan, Türkiyə - İran sərhədlərində seksiyaların tikintisini özündə birləşdirəcək. Tikintinin ikinci mərhələsi çərçivəsində, boru kəmərinin nəql imkanlarının ildə 31 mlrd. kubmetr qaza çatdrılması üçün əlavə kompressor stansiylaarı inşa ediləcək
"Nabukko" - Rusiyadan yan keçərək Mərkəzi Asiyadan Avropa İttifaqı ölkələrinə, ilk əvvəl Avstriya və Almaniyaya çəkiləcək, 3,3 min kilometr uzunluğunda layihələndirilən magistral qaz kəməridir. Onun layihə gücü ildə 26 -32 mlrd. kubmetr qazdır. Tikinti işlərinin 2013 -cü ilədək yekunlaşdrılması planlaşdırılır.
Qaz kəmərinin tikintisi üzrə Konsorsiumda bu şirkətlər iştirak edir: OMV Gas GmbH (Avstriya), Botas (Türkiyə ), Bulgargaz (Bolqarıstan) , S.N.T.G.N. Transgaz S.A. (Rumıniya), MOL Natural Gas Transmission Company Ltd. (Macarıstan), RWE (Almaniya).
2004-cu ildə təqdim olunan "Nabukko" boru kəməri layihəsi qazın İran və Fars Körfəzindəki yataqlardan tədarükünü nəzərdə tuturdu. 2006 -cı ildə İranın nüvə proqramı ətrafında yaranan münaqişə ilə əlaqədar, layihənin dəyişdirilməsi və qazın Türkmənistan, Özbəkistan və Azərbaycandan tədarük olunması barədə qərar qəbul olundu.
