Azərbaycan, Bakı, 24 noyabr/ Trend , müxbir E.İsmayılov/ SOCAR şirkətinin Gürcüstanın Kulevi Qara dəniz limanındakı neft terminalının rəhbərliyi dekabr ərzində Aqurkarxana və Kvaloni dəmir yolu stansiyaları yaxınlığındakı yolların yenidən qurulmasını başa çatdırmağı planlaşdırır, - terminaldakı məlumatlı mənbə bazar ertəsi bildirib.
Bu iki stansiya Santredi və Çaladidi stansiyaları arasında yerləşir. Aqurkarxanada yenidən qurulan sahələrin uzunluğu 815 metr, Kvalonidə 720 metr təşkil edəcək.
Santredi dəmir yolu stansiyası yaxınlığında terminala aparan altı dəmir yolu xəttinin yenidən qurulması başa çatmaq üzrədir. Burada yenidən qurulan yolların ümumi uzunluğu 5 kilometrdir.
Bu işlər başa çatdıqdan sonra Çaladididən Kulevi terminalına ikinci əlavə dəmir yolu xəttinin tikintisinə başlamaq planlaşdırılır. Bu yol terminala bir yolla daxil olub, digər yolla çıxmağa imkan verəcək. Hazırda Kulevi terminalına cəmi bir dəmir yolu xətti aparır, - mənbə bildirib. Çaladidi stansiyasından Kulevidəki terminaladək əlavə xəttin tikintisinə 2009 - cu ilin əvvəlində başlamaq planlaşdırılır. Bu dəmir yolu xəttinin uzunluğu 13 km təşkil edəcək.
Müəlliflə əlaqə saxlamaq üçün elektron ünvan: [email protected]
