Azərbaycan, Bakı, 10 dekabr/ Trend , müxbir A.Bədəlova/ Dünya maliyyə böhranı "Nabukko" qaz kəməri layihəsinin sərmayə cəhətdən cəlbediciliyinə təsir göstərməyir. Bu barədə beynəlxalq layihələr və Avstriyanın OMV şirkətində"Nabukko"nun nümayəndəsi Kristian Dolezal (Christian Dolezal) hesab edir.
"Uzunmüddətli nəqliyyat müqavilələrinə malik infrastruktur layihəsi kapital yatırılması baxımından etibarlıdır", - deyə çərşənbə günü Trend -a elektron poçt ilə Dolezal bildirib.
Onun sözlərinə görə, dünyada enerjiyə artan tələbat və alıcıların geniş spektri bu layihənin bank tərəfindən maliyyələşdirilməsinə davamlı əsası təmin edir.
Dəyəri $12,4 mlrd. olan "Nabukko" qaz kəməri ilə Azərbaycan və Mərkəzi Asiyadan Avropa İttifaqı ölkələrinə qaz ixrac etmək nəzərdə tutulur. Qaz kəmərinin çəkilməsi 2010-cu ilə təyin edilib. Boru kəmərinin maksimal ötürmə gücü ildə 31 mlrd. kubmetr olacaq. Qaz kəməri üzrə ilk nəql 2013-cü ildən gözlənilir.
Dolezal bildirib ki, boru kəmərinə yatırılan sərmayələr, hətta "Nabukko"nun dəyərinin (5 mlrd. avrodan 7,9 mlrd. avroyadək) bahalaşmasına baxmayaraq, gəlir gətirəcək. Layihənin dəyərinin qaldırılması baxımından yenidən nəzərdən keçirilməsinə, əsasən, poladın qiymətinin qalxması səbəb olub ki, bu da neft qiymətlərinin artması nəticəsində baş verib. "Nabukko" qaz kəmərinin tikintisi üçün iki mln. ton polad və 200 min boru tələb olunur.
"Poladın qiymətinin qalxmasına digər səbəb bu məhsula, digər metallara, infrastruktur layihələrin tikintisi üçün mühəndis xidmətlərinə böyük tələbat olub", - deyə Dolezal bildirib.
Dolezalın sözlərinə görə, qaz rəqabətli şərtlərlə Avropa bazarlarına tədarük oluna bilər.
Layihənin ümumi dəyərinin təqribən 30 faizi layihədə iştirak payı əsasında Nabucco Gas Pipeline International sərmayədarları tərəfindən maliyyələşdiriləcək.
Layihənin iştirakçıları OMV, Macarıstanın MOL, Bolqarıstanın Bulgargaz, Rumıniyanın Transgaz, Türkiyənin Botas və Almaniyanın RWE şirkətləridir. Onların hər birinin bərabər payı var - 16,67 faiz.
Qalan 70 faiz kreditorlar hesabına ödənəcək. Onun üçdə biri AYİB, Avropa İnvestisiya Bankı, Beynəlxalq Maliyyə Korporasiyası kimi beynəlxalq maliyyə institutları tərəfindən maliyyələşdiriləcək. Qalan hissəsi ixrac kredit agentlikləri və kommersiya banklarının payına düşəcək.
Dolezal bildirib ki, qaz tədarükçüləri "Nabukko" boru kəmərinin gücünü "yüklə və ya ödə" tipli uzunmüddətli bazis şərtləri ilə ehtiyatda saxlayacaqlar. 15-20 illik uzun müddətli müqavilələr Nabucco Gas Pipeline International GmbH ilə bağlanacaq.
Məqalə müəllifi ilə əlaqə ünvanı: [email protected]
