Azərbaycan, Bakı, 18 dekabr/ Trend , müxbir N.İsmayılova/ Abşeron yarımadasının ekoloji təmizlənməsinə dair uzunmüddətli proqramın birinci fazası üzrə görülmüş işlərin icmalı üçün, Dünya Bankının ekologiya üzrə baş mütəxəssisi Volfhard Pol dekabrn 19 - dək Bakıda olacaq, - Bankın Bakı nümayəndəliyindən cümə axşamı bildiriblər.
Bankın missiyası layihənin realizəsinin başlamasına hazırlıqla tanış olacaq. Ekoloji proqram üzrə tammiqyaslı işlər, hələ imzalanmamış kredit sazişi qüvvəyə mindikdən sonra başlayacaq, - DB-nin nümayəndəliyindən dəqiqləşdiriblər.
"Proqram çərçivəsində yeni layihənin hazırlanması üzrə müzakirələr başlayıb. O, "Ekoloji standartlar və onların tətbiqi normaları" adlanacaq və proqramın dördüncü komponenti olacaq", - DB-nin nümayəndəliyindən bildiriblər.
DB Direktorlar Şurası layihənin maliyyələşdirilməsi üçün 163,5 mln. dollar həcmində krediti təsdiqləyib. Layihənin ümumi dəyəri 364,5 mln.dollara bərabərdir.
DB - nin krediti Beynəlxalq Yenidənqurma və İnkişaf Bankının şərtləri əsasında, dörd il güzəştli dövr olmaqla, 17 il müddətində illik libor+0,05 faiz dərəcə ilə veriləcək.
Layihə üç müstəqil komponentə ayrılıb və müxtəlif dövlət orqanları - Dövlət Neft Şirkəti, Fövqəladə Hallar, İqtisadi İnkişaf, Ekologiya və Təbii Sərvətlər Nazirliklərini əhatə edir. Ekoloji normaların, standartların, sertifikatlaşdırma sisteminin təkmilləşdirilməsini nəzərdə tutan Ekologiya və Təbii Sərvətlər Nazirliyinin komponenti isə, proqramın birinci fazasından çıxarılaraq, ikinci fazasına daxil edilib. İkinci fazanın 2009 - cu il maliyyə ilində təsdiqlənəcəyi gözlənilir.
Birinci komponet üzrə ARDNŞ üçün "möhkəm" sərmayələr hesabına qruntun təmizlənməsi üçün avadanlığın əldə edilməsi nəzərdə tutulur. Bundan əlavə, Dövlət Neft Şirkətinin ekoloji təcrübəsinin təkmilləşdirilməsi üçün texniki yardım, o cümlədən bu sahədə strategiya və siyasətin hazırlanması və onların əməliyyat işində tətbiqi nəzərdə tutulub.
İkinci komponent üzrə Ramanı və Suraxanıdakı keçmiş yod istehsalı zavodlarının ərazisindəki radioaktiv kömürün təmizlənməsi üçün FHN-ə yardım göstəriləcək. Sovet dövründə bu müəssisələr kömür dənəciklərinin köməyi ilə neft quyularından əldə edilmiş qrunt sularının filtrasiyası yolu ilə yod istehsal edirdilər. Hazırda bu dənəciklər toplanıb və filtrlərdə radioaktiv su (onun tərkibində radon var) yaranıb. Ərazinin təhlükəsizliyini təmin etmək üçün DB onun utilizasiyasına vəsait ayıracaq. FHN -ə yardımın ikinci istiqaməti hava limanı yaxınlığında 1 min hektar ərazinin neftlə çirklənmiş torpaq qatlarının təmizlənməsini nəzərdə tutur.
Üçüncü komponent üzrə İqtisadi İnkişaf Nazirliyi xətti üzrə məişət tullantılarının idarə edilməsi sisteminin yaradılması nəzərdə tutulub.
Müəlliflə əlaqə saxlamaq üçün elektron ünvan: [email protected]