Azərbaycan, Bakı, 06 yanvar / Trend / İtaliyanın "Edison" qaz şirkətinin 2009-2014-ci illərə olan biznes-planında deyilir ki, 2014-cü ilə Avropanın qaza olan tələbatı 15 faiz artaraq ildə 648 mlrd. kubmetrə qədər çatacaq.
Şirkətin proqnozlarına görə, 2020-ci il üçün "Edison" tərəfindən Avropa İttifaqının 27 ölkəsi, Norveç, İsveçrə və Türkiyənin daxil edildiyi Avropada qazın istifadəsi ildə 720 mlrd. kubmetrə çatacaq.
Avropada 2014-cü il üçün qaza tələbatda əsas payı olan - elektrik enerjisi istehsal edən şirkətlər (232 mlrd. kubmetr), sonra isə əhali (210 mlrd. kubmetr) olacaq. Sənaye sahəsinin payına - 181 mlrd. kubmetr düşəcək.
Buna bənzər hal 2020-ci ildə də baş verəcək, elektrik enerjisi istehsalına - 274 mlrd. kub metr, əhaliyə - 224 mlrd. kub metr, sənaye müəssisələrinə isə - 193 mlrd. kub metr qaz lazım olacaq.
"Edison" 2020-ci il üçün Avropanın qaz idxalından asılılığının əhəmiyətli dərəcədə artacağını proqnozlaşdırır. Bu zaman Avropaya lazım olan 720 mlrd. kubmetrdən 470 mlrd. kubmetr qaz alınacaq. Bununla yanaşı, boru vasitəsi ilə 290-320 mlrd. kubmetr, mayeləşdirilmiş qaz halında isə 150- 180 mlrd. kubmetr idxal olunacaq.
