Azərbaycan, Bakı, 30 yanvar/ Trend /
Azərbaycan prezidenti İlham Əliyev cümə günü Davosda BP şirkətinin prezidenti Toni Heyvordla görüş keçirib. Bu barədə AzərTAc Dövlət İnformasiya Agentliyi xəbər verir.
Görüş zamanı Azərbaycan və BP şirkəti arasında uzun məhsuldar və səmərəli əməkdaşlıq qeyd olunub, ölkədə enerji sektorunda aparılan işlər, o cümlədən Azərbaycanın enerji təhlükəsizliyinin təmin olunmasında artan rolu müzakirə edilib. Görüşdə Azərbaycan və BP arasında əməkdaşlığın genişlənməsinə əminlik ifadə olunub.
BP şirkəti "Azəri - Çıraq - Günəşli" dəniz yataqları blokunu işləyən Azərbaycan Beynəlxalq Əməliyyat Şirkətinin (ABƏŞ) operatorudur. Azərbaycanda neft hasilatının əsas hissəsi məhz bu yataqların payına düşür. Bundan başqa, şirkət Bakı - Tbilisi - Ceyhan boru kəmərinin operatoru qismində çıxış edir. ABƏŞ Bakı - Supsa boru kəmərinin də operatorudur.
BP "Şahdəniz" qaz - kondensat yatağının işlənilməsi layihəsinin texniki operatoru kimi çıxış edir.
Müəlliflə əlaqə saxlamaq üçün elektron ünvan: [email protected]