Azərbaycan, Bakı, 22 aprel / Trend , müxbir E.İsmayılov /
SOCAR (Azərbaycan Respublikası Dövlət Neft Şirkəti) 2009-cu il yayında "Günəşli" yatağındakı yeni kompressor stansiyasının tikintisini başa çatdıracaq. Bunun nəticəsində atmosferə aşağı təzyiqli qaz tullantılarının həcmi 90 faiz azalacaq", - çərşənbə günü SOCAR-ın ekologiya məsələləri üzrə vitse-prezidenti Muxtar Babayev deyib.
"İşlər gedir, biz onları bu ilin yayına qədər başa çatdırmalıyıq. Tikinti bitəndən və test işləri aparılandan sonra stansiya istismara veriləcək. Stansiyanın işə buraxılışı bu ilə planlaşdırılıb", - Babayev deyib.
SOCAR "Günəşli" yatağının dayaz hissəsindən çıxan səmt qazının yığımını həyata keçirmək niyyətindədir. Bu qaz sıxılmadan (təzyiqin yüksəldilməsindən) sonra Azərbaycan qaz emalı zavoduna, ya da milli qaz ötürücü sistemə, oradan da abunəçilərə ötürüləcək.
Əvvəllər bu qaz infrastruktur çatışmazlığı üzündən havaya sovrulur, ətraf mühitə böyük ziyan vururdu. Lazımi infrastrukturun yaradılması və bu layihənin reallaşdırılma dəyəri 150 milyon dollardır.
Havaya buraxılan qazın həcmi ildə 200 milyon kubmetrdir. Layihənin "Günəşli-4" platformasında yanacağın sıxılması üçün kompressorlar quraşdırılacaq. Üstəlik, bu qazın nəqli üçün əlavə boru kəmərlər salınıb.
Məqalə müəllifi ilə əlaqə ünvanı: [email protected]
