JPMorgan bankı bu il dünyanın neftə olan tələbatının sutkada 2 mln. bareldən çox azalacağını proqnozlaşdırır

Azərbaycan, Bakı, 22 aprel / Trend , müxbir A.Bədəlova /

Amerikanın dünyanın iri banklarından biri olan JPMorgan bankının proqnozlarına əsasən, 2009-cu ildə dünyanın neftə olan tələbatı 2,2 mln. barel azalaraq 2008-ci ilin 85,8 mln. barelinə nisbətdə sutkada 83,6 mln. barelə çatacaq.

Bu il neftə ən az tələbat ikinci rübdə - sutkada 82,6 mln. barel müşahidə olunacaq. 2009-cu ilin dördüncü rübündə tələbat sutkada 84,9 mln. barelədək artacaq. 

2009-cu ildə dünyanın neftə olan tələbatının ümumi həcminin sutkada 46,1 mln. bareli İqtisadi Əməkdaşlıq və İnkişaf Təşkilatı (İƏİT) ölkələrinin payına, sutkada 37,5 mln. barel isə İƏİT-ə daxil olmayan ölkələrin payına düşəcək.

Bank analitiklərinin proqnozlarına əsasən, 2009-cu ildə dünyanın ümumi neft tədarükləri həcmi 3,2 mln. barel azalaraq sutkada 83,3 mln. barelə çatacaq. Bank ötən il bu göstəricini sutkada 83 mln. barel proqnozlaşdırmışdı.

OPEK-in neft tədarükləri həcmi, bankın proqnozlarına görə, bu il sutkada 28,2 mln. barel təşkil edəcək ki, bu da 2008-ci ilin həcmindən 3,1 mln. barel azdır. OPEK-ə daxil olmayan ölkələr 2009-cu ildə 2008-ci ilin 48,3 mln.barelinə nisbətdə sutkada 48,1 mln. barel neft tədarük edəcək.