Azərbaycan, Bakı, 12 iyun / Trend /
"ARDNŞ şirkəti bu ilin yanvar-may aylarında Bakı-Tbilisi-Ceyhan (BTC) boru kəməri ilə 14,4 milyon ton neft nəql edib. Ötən ilin analoji dövründə bu rəqəm 7,6 milyon ton olub", - ARDNŞ-ın məlumatında deyilir.
Bu kəmərlə may ayında 3,3 milyon ton neft nəql edilib. Ümumilikdə, nəqlin başlanmasından indiyə qədər 84,8 milyon ton neft nəql edilib.
BTC boru kəmərinin ümumi uzunluğu 1768 kilometrdir. Bunun 443 km Azərbaycan, 249 km Gürcüstan, 1076 km Türkiyə ərazisindən keçir. Boru kəmərinin tikintisi 2003-cü ildə, onun neftlə doldurulması isə 2005-ci il mayın 18-də başlayıb.
BTC-nin tikintisi 4 mlrd. dollara başa gəlib. Bu, tikinti işləri, boru kəmərinin doldurulmasına çəkilən xərclərdir. Maliyyə xərcləri və bank faizlərinin ödənilməsi bura daxil deyil. Ümumi maliyyə kreditinin məbləği 2,6 mlrd. dollar təşkil edir.
BTC Co-nun səhmdarları aşağıdakılardır: BP (30,1 faiz); AzBTC (25 faiz); Chevron (8,90 faiz ); Statoil (8,71 faiz ); ТРАО (6,53 faiz ); Eni (5 faiz ); Total (5 faiz ); Itochu (3,40 faiz ); Inpex (2,50 faiz ); ConocoPhillips (2,50 faiz ) və Amerada Hess (2,36 faiz ).