Azərbaycan, Bakı, 31 avqust / Trend , müxbir E.İsmayılov /
ARDNŞ Azərbaycanın Xəzər dənizi sektorunda "Ümid" perspektiv qaz strukturunda ilk kəşfiyyat quyusunun qazılması çərçivəsində layihə üzrə olan 6500 metrdən 1000 metrdən çox qazma işləri həyata keçirib. Bu barədə bazar ertəsi şirkətdəki mənbədən bildirilib.
Bu, ARDNŞ-nin son 15 il ərzində həyata keçirdiyi ilk kəşfiyyat quyusudur. "Ümid" perspektiv strukturda güman edilən qaz ehtiyatları 300 milyard kubmetr həcmində, güman edilən qaz-kondensat ehtiyatları isə 30-40 milyon ton həcmində qiymətləndirilir.
"Qazma işləri yaxşı gedir və min metr işarəsi artıq keçilib. Bu il dörd min metr qazma planlaşdırılırdı", - mənbədən bildirilib.
Strukturda qazma işlərinin bir neçə həftə öncə başlanmasına baxnmayaraq, görülən işlərin bu həcmi təbəqənin yumşaq və qazma üçün əlverişli olması ilə izah olunur.
Digər mənbənin fikrincə, bu struktur yüksək təzyiq və mürəkkəb geologiyası ilə fərqləndiyindən şirkətin qazma işləri çətin olacaq.
Strukturda kəşfiyyat quyusunun qazılmasını ARDNŞ-nin tərkibinə daxil olan "Bayıl Limanı" Kəşfiyyat Qazma İdarəsi həyata keçirəcək.
Əvvəlcə ARDNŞ kəşfiyyat quyusunun qazılması həyata keçirilən "Ümid-1" platformasının inşasını tamamlayıb. "Ümid-1" platforması hələ tikilib başa çatmayan "Çıraq-6" platforması bazasında inşa edilib və proqram çərçivəsində ən böyük obyektdir, hündürlüyü 72 metrdir. Platforma "Bulla dəniz" yatağının 15 kilometrliyində, dənizin 58 metr dərinliyində yerləşir. Ümumilikdə, platformadan altı qaz quyusunun qazılması planlaşdırılır.
Məqalə müəllifi ilə əlaqə ünvanı: [email protected]
