Azərbaycan, Bakı, 16 sentyabr / Trend , müxbir E.İsmayılov /
Hazırkı mərhələdə Xəzərin Azərbaycana aid sektorunda yerləşən sözügedən yataqdan qaz satışı üzrə kommersiya razılaşmalarının və tranzit şəraitinin olmaması səbəbindən "Şahdəniz" qaz layihəsinin ikinci fazasının həyata keçirilməsi 2016-cı ilə nəzərdə tutulub. Bu barədə çərşənbə günü layihədə 10 faiz pay sahibi olan ARDNŞ-nin yüksək vəzifəli nümayəndəsi deyib.
Onun sözlərinə görə, texniki xarakterli məsələlər də mövcuddur.
Şirkətin digər yüksək vəzifəli nümayəndəsinin sözlərinə görə, ikinci fazaya start vermək üçün ixrac boru kəməri ilə bağlı məsələ həllini tapmalıdır.
"Boru kəməri olmadan yatağın işlənməsi üzrə ikinci mərhələni heç kim təsdiqləməyəcək", - o bildirib.
"Şahdəniz" yatağının işlənməsinə dair müqavilə 1996-cı il iyunun 4-də imzalanıb. Layihə iştirakçıları bunlardır: BP (operator) - 25,5 faiz, Statoil Hydro - 25,5 faiz, NICO - 10 faiz, Total - 10 faiz, LukAgip - 10 faiz, TPAO - 9 faiz, ARDNŞ - 10 faiz. Bu yataqda ümumi qaz ehtiyatı 1,2 trln. kubmetr həcmində qiymətləndirilir.
Hazırda qaz Cənubi Qafqaz boru kəməri vasitəsilə Gürcüstan və Türkiyəyə nəql edilir. Azərbaycan da qazın alıcısıdır. Layihənin birinci mərhələsi çərçivəsində 2009-cu ildə 7,2 milyard kubmetr qazın hasil olunması nəzərdə tutulub. Maksimum hasilat isə gələn ilə proqnozlaşdırılır: 8,6 - 9 milyard kubmetr. Layihənin ikinci mərhələsində ildə 20 milyard kubmetrə yaxın qazın hasil edilməsi planlaşdırılır.
Məqalə müəllifi ilə əlaqə ünvanı:[email protected]
