Qazaxıstan, Astana, 24 sentyabr / Trend , müxbirlər K.Konırova, E.İsmayılov /
ARDNŞ hələlik Azərbaycan qazının Qazaxıstan üzərindən Çinə nəql edilməsi məsələsini gözdən keçirmir. Bu barədə cümə axşamı ARDNŞ prezidenti Rövnəq Abdullayev Astanada deyib.
"Azərbaycan qazının tədarükü məsələsinə hələlik baxılmır. Bu, Azərbaycan qazının tədarükünün diversifikasiyası üzrə ümumi istiqamətdir", - Abdullayev bildirib.
Abdullayevin dediyinə görə, bu istiqamətdə tədarükü Xəzər dənizinin dibindən həyata keçirmək mümkündür və Azərbaycanın bu sahədə təcrübəsi var. Ölkə şəxsi şelfində bir neçə min kilometrlik sualtı boru kəmərlərinə sahibdir.
Keçən həftə Bakıda beynəlxalq qaz konfransının keçirilməsi zamanı Abdullayev bəyan edib ki, "KazMunayQaz" Qazaxıstan milli şirkətinin rəhbəri Kairgeldi Kabıldin ARDNŞ-yə Qazaxıstan ərazisindən Çinə qaz ixrac etməyi təklif edib.
Kabıldin bu faktı təsdiq edib. "Azərbaycan bu layihəyə maraq göstərir. Əgər bu gün Xəzər resurslarının şərqdən qərbə tədarükü məsələsinə baxılırsa, o zaman nəyə görə əks istiqamətdə - qərbdən şərqə tədarük məsələsinə baxılmasın", - Kabıldin Trend -ın xüsusi müxbirinin sualına cavab verərkən deyib.
"Azərbaycanın Qazaxıstan-Çin sistemində iştirakı Azərbaycan qazının Çin istiqamətində tədarükünün diversifikasiyası məqsədini güdür. Əgər hazırda Azərbaycan qazının qərb istiqamətində tədarükünün texniki reallaşdırılması məsələsinə baxılırsa, nəyə görə əks istiqamətdə tədarük məsələsinə baxılmır. Bu layihə sualtı boru kəmərlərinin inşasını tələb edir, lakin Xəzərin statusu məsələsi həll edilməyincə boru kəmərlərinin inşasından söz gedə bilməz. Lakin əgər Xəzəryanı ölkələr status barədə razılığa gəlsələr, bu layihə mümkün olacaq", - Kabıldin deyib. "KazMunayQaz" rəhbərinin fiikrincə, bu layihə gələcəyin layihəsidir.
Qazaxıstan-Çin qaz kəməri ilə ilk buraxılış bu il dekabrın 16-da baş tutacaq. Bu qaz kəmərinin gücü 40 milyard kubmetr qaz təşkil edir.
Məqalə müəllifi ilə əlaqə ünvanı: [email protected]