Azərbaycan, Bakı, 06 oktyabr / Trend , müxbir A.Bədəlova/
Macarıstan Parlamenti oktyabrda "Nabukko" layihəsi iştirakçıları tərəfindən iyulda imzalanan hökumətlərarası müqaviləni təsdiqləyəcək. Bu barədə Macarıstanın layihə üzrə xüsusi nümayəndəsi Mihali Bayer bildirib.
"İyulda Ankarada "Nabukko" layihəsi üzrə hökumətlərarası müqaviləni imzalayan beş ölkənin - Avstriya, Macarıstan, Bolqarıstan, Rumınıya və Türkiyə parlamentləri onu təsdiqləməlidirlər", - Bayer çərşənbə axşamı Bakıda Azərbaycan Prezidenti yanında Strateji Araşdırmalar Mərkəzində çıxış edərkən bildirib.
İyulun 13-də Ankarada tranzit ölkələrin baş nazirləri tərəfindən "Nabukko" layihəsi üzrə hökumətlərarası müqavilə imzalanıb. Müqavilə Xəzər və Yaxın Şərq regionundan Aİ ölkələrinə qaz nəqlini nəzərdə tutur.
Qaz kəmərinin çəkilişi 2011-ci ilə təyin edilib. İlk tədarüklərə 2014-cü ildə start veriləcək. Boru kəmərinin maksimal gücü ildə 31 mlrd. kubmetrə bərabərdir. "Nabukko" layihəsi üzrə əsas qaz tədarükçüsü qismində Azərbaycan və İraq nəzərdən keçrilir. Gələcəkdə türkmən qazının da layihəyə qoşulması gözlənilir.
Bayerin sözlərinə görə, Macarıstan "Nabukko" layihəsinin həyata keçirilməsinə yardım etmək üçün bütün səylərini göstərir. Bayerin qeyd etdiyi kimi, Macarıstan tərəfindən layihəyə siyasi dəstək göstərilməsi məqsədi ilə International Nabucco Board-ın təsis edilməsi təklif edilib.
"Biz iştirakçı dövlətlərin və ya "Nabukko" layihəsinə dəstək göstərməyə hazır olan bütün ölkələrin nümayəndələrini birləşdirmək istəyirik", - Bayer bildirib.
Məqalə müəllifi ilə əlaqə ünvanı: [email protected]
