Azərbaycan, Bakı, 16 oktyabr / Trend , müxbir E.İsmayılov/
Yanvar-sentyabr aylarında SOCAR Georgia Petrolium (Azərbaycan Respublikası Dövlət Neft Şirkətinin (ARDNŞ) törəmə müəssisəsi) Gürcüstan bazarında 313 min ton Azərbaycan neft məhsullarının satışını həyata keçirib, cümə günü SOCAR Energy Georgia-dan deyilib.
Bu müddət ərzində Gürcüstan bazarında 148.2 min tondan artıq avtomobil benzini satılıb.
Yanvar-sentyabr aylarında SOCAR Georgia Petrolium Gürcüstan bazarında 129 min ton dizel yanacağı, 22.7 min ton aviasiya kerosini, 3.6 min ton mazut, 6.8 min ton neft bitumu və 2.6 min tondan artıq mayeləşdirilmiş qaz satıb.
Mənbədən daha əvvəl verilən məlumata əsasən, bu ilin ikinci yarısında şirkət Gürcüstan bazarında 221 min ton Azərbaycan neft məhsullarının satışını planlaşdırır. Bu ilin birinci yarısında SOCAR Georgia Petrolium Gürcüstan bazarında 197 min ton neft məhsulları satıb.
Azərbaycanın neft məhsulları Gürcüstan bazarının təxminən 50-60 faizini tutur. Azərbaycanın dizel yanacağı bazarın təxminən 60 faizini, benzin isə 52-55 faizini tutur.
ARDNŞ-in tərkibinə daxil olan neft emalı zavodlarında (NEZ) neft emalının ümumi həcmi yanvar-sentyabr aylarında təxminən 4.5 milyon tondan artıq olub. 2008-ci ilin analoji dövründə isə Azərbaycan NEZ-lərində 5.5 milyon tona yaxın neft emal olunub.
2008-ci ildə Azərbaycan NEZ-lərində 7,35 milyon tona yaxın neft emal olunub.
Azərbaycanda cəmi iki NEZ var. İki zavodun məcmu gücü ildə 20 milyon tondur. NEZ-lər öz vəsaitləri hesabına dəniz və qurudakı yataqlardan əldə etdiyi ildə 7 milyon ton nefti emal edən ARDNŞ-in tərkibinə daxildir.
Məqalə müəllifi ilə əlaqə ünvanı: [email protected]
