Azərbaycan, Bakı, 30 oktyabr / Trend , müxbir E.İsmayılov/
Noyabrda Rusiyanın "Lukoyl" şirkəti Odessadakı neft emalı zavodunun işini bərpa edəcək. Bu haqda şirkətin rəsmi internet saytında yerləşdirilmiş məlumatda deyilir.
Məlumatda deyilir ki, Rusiyanın neft nəql edən "Transneft" şirkəti noyabrın 1-dən "Belorus sərhədi-Ukrayna sərhədi-Brodı-Odessa" marşrutu ilə "Dostluq" boru kəməri vasitəsilə neftin nəqlinə başlamaq üçün texniki imkanları araşdırıb.
Ukraynanın "Ukrtransneft" şirkətinin oktyabrın 1-dən "Lisiçansk-Kremençuk-Odessa NEZ-i" marşrutu ilə neft daşınmasını dayandırması səbəbindən 2009-cu ilin oktyabrın əvvəlində Lukoyl şirkəti Odessadakı neft emalı zavodunun işini dayandırmışdı. Bu haqda məlumatda deyilir.
Bu boru kəməri ilə "Ukrtransneft" neftinin nəqlinin dayandırılmasına səbəb həmin boru kəməri ilə Kremençuq NEZ-nə Xəzər neftinin daşınmağa başlaması olmuşdu.
"Ukrtransneft" tərəfindən Odessa NEZ-nə neftin daşınması təklif edilən digər marşrutlar müəssisəyə xammal gətirilməsini nəzərəçarpacaq dərəcədə pisləşdirirdi. Həmçinin cari ilin oktyabrında "Transneft" şirkətinin Odessa NEZ-nə neft nəqlini təmin etmək üçün texniki imkanları yox idi.
Noyabrda "Lukoyl"un Odessadakı NEZ-i 195 min ton neft alacaq və neft məhsulları emalını əvvəlki həcmdə bərpa edə biləcək.
Məlumatda o da deyilir ki, "Lukoyl" Odessadakı NEZ-ə xammal gətirilməsini yaxşılaşdırmaq üçün bütün maraqlı tərəflərlə danışıqları davam etdirəcək.
Məqalə müəllifi ilə əlaqə ünvanı: [email protected]
