Azərbaycan, Bakı, 16 noyabr / Trend , müxbir E.İsmayılov/
ARDNŞ-in Geologiya və Geofizika İdarəsi tərəfindən 2008-ci ildən 104,69 kvadrat metr ərazidə üçölçülü seysmik tədqiqatlar aparılıb, şirkətin rəsmi saytında dərc edilmiş 2008-ci ilin yekunları üzrə hesabatında deyilir. 2008-ci ildə şirkət həmçinin 639,25 metr ərazidə ikiölçülü tədqiqat işləri də aparıb.
Sənaye geofizikası çərçivəsində Geologiya və Geofizika İdarəsi tərəfindən 31 quru ərazisində və Xəzər dənizinin Azərbaycan sektorunda yerləşən 14 ərazidə neft-qaz quyularında işlər aparılıb.
Həmçinin geoloji-mühəndis işləri çərçivəsində 2008-ci ildə ARDNŞ tərəfindən geoloji-mühəndis qazmaları üzrə işlər aparılıb (cəmi 15144 metr), 36 kilometrdə fasiləsiz seysmoakustik profilləşmə işləri aparılıb, 4028 kilometr sonar işlər görülüb, 2510,4 xətti kilometr batimetriya və 693,6 hektar topoqrafik işlər görülüb.
Hazırda ARDNŞ 59 neft qaz yatağını işləyir ki, bunlardan 41-i quruda, 18-i isə dənizdə yerləşir.
Keçən il ARDNŞ planlaşdırılmış 187 min metrə nisbətdə 198,2 min metrə yaxın ərazidə istismar qazma işləri aparıb. 2007-ci ildə bu göstərici 185,2 min metrdən artıq olub. Şirkət 2008-ci ildə planlaşdırılmış 9,5 min metrə nisbətdə 4,8 min metrə yaxın həcmdə kəşfiyyat qazma işləri aparıb. 2007-ci ildə 5,1 min metrdən artıq kəşfiyyat qazmaları aparılıb.
ARDNŞ ümumilikdə 2008-ci ildə proqnozlaşdırılmış 169,5 min metrə nisbətdə 203 min metrə yaxın qazma işləri aparıb. 2007-ci ildə isə şirkət cəmi 190,4 min metr qazıb.
2008-ci ildə ARDNŞ proqnozlaşdırılmış 114 quyuya nisbətdə 112 quyu qazıb. 2007-ci ildə bu göstərici 113 təşkil edib. 2008-ci ildə qazılan quyuların ümumi həcmindən 111-i istismar quyusu, biri isə kəşfiyyat quyusu olub. 2007-ci ildə bu göstərici müvafiq olaraq 114 və 2 olub. 2008-ci ildə şirkət 140 quyunun inşasını başa çatdırıb.
Məqalə müəllifi ilə əlaqə ünvanı: [email protected]
