Azərbaycan, Bakı, 17 noyabr / Trend /
Dövlət Statistika Komitəsinin məlumatına görə, yanvar-oktyabr aylarında Azərbaycanın nəqliyyat sektorunda 154,6 milyon ton müxtəlif yük daşınıb ki, bu da keçənilki göstəricidən 3 faiz çoxdur.
Daşınan yüklərin 72,9 faizi özəl sektorun payına düşür. Yanvar-oktyabrda yüklərin ümumi həcminin 48,1 faizi avtomobil nəqliyyatı, 33,6 faizi boru kəmərləri, 11,1 faizi dəmiryol, 7,2 faizi isə dəniz nəqliyyatı ilə daşınıb.
Yanvar-oktyabr aylarında sərnişin nəqliyyatı ilə 1,1 milyarda yaxın sərnişin daşınıb ki, bu da 2008-ci ilin müvafiq göstəricisindən 7 faiz çoxdur. Sərnişindaşımanın 83,5 faizi özəl sektorun payına düşür. Sərnişinlərin əsas hissəsi avtomobil nəqliyyatı ilə (83,5 faiz) və metro ilə (15,9 faiz) daşınıb.
Dəmiryol nəqliyyatı ilə 17,2 milyon ton müxtəlif yük daşınıb. Keçən il bu göstərici 22,9 faiz olub.
Dəniz nəqliyyatı ilə 11,1 milyon ton müxtəlif yük daşınıb ki, bu da ötən ilin yanvar-oktyabr aylarındakı göstəricidən 14,6 faiz çoxdur. Daşınan yüklərin ümumi həcminin 75 faizi neft və neft məhsullarının, 25 faizi isə quru yüklərin payına düşür. Daşınan yüklərin ümumi həcmi beynəlxalq əməliyyatların payına düşür. Yanvar-oktyabr aylarında Azərbaycan limanlarında emal edilmiş yüklərin həcmi 4,3 milyon ton təşkil edir.
Avtonəqliyyatla 74,4 milyon ton yük daşınıb ki, bu da 2008-ci ilin yanvar-oktyabr aylarındakı göstəricidən 5,8 faiz çoxdur. Sərnişindaşımanın həcmi 7,1 faiz artımla 911,8 milyon nəfər təşkil edib. Sərnişinlərin 96,5 faizi avtobusla, 3,5 faizi isə minik avtomobili ilə daşınıb.
Metropolitenlə sərnişindaşımanın həcmi 6,9 faiz artaraq 173,5 milyon nəfər təşkil edib.
Birinci rübdə hava nəqliyyatı ilə 844,9 min sərnişin daşınıb ki, bunun da 10,2 faizi özəl sektorun payına düşüb.
Azərbaycan ərazisi üzərindən Avrasiya nəqliyyat dəhlizi üzrə 2009-cu ilin yanvar-sentyabr aylarında 32,1 milyon ton yük və 152,2 milyon sərnişin daşınıb.
