Azərbaycan, Bakı, 15 dekabr / Trend /
"Tengiz" yatağından "Bakı-Tbilisi-Ceyhan" (BTC) boru kəməri vasitəsilə yanvar-noyabrda 1,7 milyon ton Qazaxıstan nefti nəql edilib. Yanvar-oktyabrda bu göstərici 1,5 milyon ton olub. Bu barədə Azərbaycan Dövlət Statistika Komitəsindən məlumat verilib.
2008-ci ildə (oktyabr-dekabr) BTC vasitəsilə 285,1 min ton Qazaxıstan nefti nəql edilib.
Ötən ilin oktyabr ayında ABŞ-ın ChevronTexaco şirkəti BTC vasitəsilə Tengiz neftinin nəqlinə başlayıb. Müqavilənin şərtlərinə əsasən, Tengiz nefti BTC və dəmiryol vasitəsilə Gürcüstan limanlarına (Kulevi və Batumi) qədər nəql ediləcək. Nəql edilən neftin həcminin ildə dörd milyon tonadək artırılması gözlənilir.
ChevronTexaco şirkəti Qazaxıstanın "Tengiz" yatağının operatorudur. Müqavilə sahələrinin işlənilməsi ilə "Tengiz Şevroyl" əməliyyat şirkəti məşğul olur.
BTC boru kəmərinin ümumi uzunluğu 1768 kilometrdir ki, bunun da 443 km-i Azərbaycan, 249 km-i Gürcüstan, 1076 km-i isə Türkiyə ərazisindən keçir. Boru kəmərinin inşasına 2003-cü ilin aprelində, neftlə doldurulmasına isə 2005-ci ilin mayında başlanılıb.
BTC Co-nun səhmdarları aşağıdakılardır: bp (30,1 faiz); AzBTC (25 faiz); Chevron (8,90 faiz); Statoil (8,71 faiz); ТРАО (6,53 faiz); Eni (5 faiz ); Total (5 faiz); Itochu (3,40 faiz ); Inpex (2,50 faiz); ConocoPhillips (2,50 faiz) və Amerada Hess (2,36 faiz).
Kulevidəki Gürcüstan Qara dəniz terminalının sahibi Azərbaycan Respublikası Dövlət Neft Şirkəti və Batumidəkinin sahibi isə "QazMunayQaz"-dır.
