Azərbaycan, Bakı, 18 fevral / Trend , müxbir V.Şərifov/
Azərbaycanın iki quru yatağında neft hasilatı ilə məşğul olan Salyan Oil əməliyyat şirkəti mart ayında bu ildə birinci istismar quyusunu qazmağa başlayacaq. Bu barədə cümə axşamı neft qaz bazarında məlumatlı mənbə deyib.
Quyunun layihə üzrə dərinliyi 3500 metr təşkil edir, o, "Kürsəngi-Qarabağlı" müqavilə sahəsinin tərkibinə daxil olan "Qarabağlı" yatağında qazılacaq.
"Bu ilin ilk quyusunun qazılışı, güman ki, mayda başa çatdırılacaq", - mənbə deyib.
Bu ilin əvvəlində Salyan Oil şirkətinin əməliyyat komitəsinin Bakıda keçirilən iclasında bu il iki istismar quyusunun qazılması planlaşdırıldığı qeyd edilib. Üçüncü əlavə quyunun qazılması istisna edilmir.
"İki quyunun qazılması nəticəsindən asılı olaraq, üçüncü quyunun qazılması imkanları nəzərdən keçiriləcək", - mənbə deyib. Şirkət yalnız istismar quyuları qazacaq, belə ki, Salyan Oil üç kəşfiyyat quyusunun qazılmasına dair öhdəliyi artıq yerinə yetirib.
Əməliyyat şirkətinin 2010-cu il üzrə büdcəsi 27 milyon dollar səviyyəsində müəyyən olunub.
2009-cu ildə Salyan Oil müqavilə sahəsində dörd istismar quyusu qazıb. Hazırda "Kürsəngi" və "Qarabağlı" yataqlarından bir neçə il əvvəl hasil edilən sutkada 1000 ton neftə nisbətdə, sutkada 640-650 ton neft hasil edilir. Bu əvvəl işlənilmiş quyulardan neft hasilatının aşağı düşməsi və daha dərin quyuların qazılmasının zəruriliyi ilə izah edilir.
Yataq Azərbaycanın Salyan rayonu ərazisində (Bakının 150 kilometrliyində) yerləşir. Bir sıra mütəxəssislərin fikrincə, müqavilə sahəsinin neft ehtiyatı 150 milyon tondan artıqdır.
"Kürsəngi-Qarabağlı" yatağının işlənilməsinə dair müqavilənin fəaliyyət müddəti 25 il təşkil edir. Layihənin səhmdarları ARDNŞ (Azərbaycan Respublikası Dövlət Neft Şirkəti) və Çinin iki: China National Oil & Gas Exploration and Development Corp. (CNODC) və Fal Chin şirkətləridir.