Azərbaycan, Bakı, 24 fevral / Trend /
BP şirkətinin proqnozlarına görə, 2010-cu ildə Azərbaycan hökumətinin BP-nin operatoru olduğu neft-qaz layihələrindən gəliri, neftin bir bareli 60 dollar nəzərə alınmaqla, 11,4 milyard manat təşkil edəcək. Bu barədə şirkətin hesabatında bildirilir.
Hesabatda qeyd olunur ki, ötən il Azərbaycanın şirkətin operatoru olduğu layihələrdən gəliri 11,7 milyard dollar təşkil edib.
ВР Azərbaycanda aşağıdakı layihələrin operatorudur: "Azəri-Çıraq-Günəşli" (AÇG) dəniz neft yataqlar blokunun işlənməsi, "Şahdəniz" dəniz qaz-kondensat yatağının işlənməsi, "Bakı-Tbilisi-Ceyhan" (BTC) və Cənubi Qafqaz qaz kəməri ("Bakı-Tbilisi-Ərzurum") qaz kəməri.
"Azəri-Çıraq-Günəşli" layihəsinin birgə işlənməsi və hasilatın pay bölgüsü haqqında saziş 1994-cü ilin sentyabrında imzalanıb. Müqavilənin fəaliyyət müddəti 30 ildir. Layihənin iştirakçıları: BP (operator - 34,1367 faiz iştirak payı), ChevronTexaco (10,2814 faiz), ARDNŞ (10 faiz), INPEX (10 faiz), Statoil (8,5633 faiz), ExxonMobil (8,006 faiz), TPAO (6,75 faiz), Devon Energy (5,6262 faiz), Itochu (3,9205 faiz), Delta Hess (2,7213 faiz).
"Şahdəniz" yatağının işlənməsinə dair müqavilə 1996-cı il iyunun 4-də imzalanıb. Layihənin iştirakçıları bunlardır: BP (operator) - 25,5 faiz, Statoil - 25,5 faiz, NICO - 10 faiz, Total - 10 faiz, LukAgip - 10 faiz, TPAO - 9 faiz, ARDNŞ - 10 faiz.
BTC neft kəmərinin ümumi uzunluğu 1768 kilometrdir ki, bunun da 443 km-i Azərbaycan, 249 km-i Gürcüstan, 1076 km-i isə Türkiyə ərazisindən keçir. Boru kəmərinin inşasına 2003-cü ilin aprelində, onun neftlə doldurulmasına 2005-ci il mayın 18-də başlanılıb. BTC Co-nun səhmdarları aşağıdakılardır: BP (30,1 faiz); AzBTC (25 faiz); Chevron (8,90 faiz ); Statoil (8,71 faiz); ТРАО (6,53 faiz); Eni (5 faiz); Total (5 faiz); Itochu (3,40 faiz); Inpex (2,50 faiz); ConocoPhillips (2,50 faiz) və Hess (2,36 faiz).
"Bakı-Tbilisi-Ərzurum" boru kəmərinin uzunluğu 700 kilometrdən çoxdur. Ötürülmənin gücü ildə 20 milyard kubmetrdən çox təşkil edir. Bu qaz kəməri ilə Xəzərin Azərbaycan sektorunda yerləşən "Şahdəniz" yatağında hasil edilən qaz nəql olunur. Qaz Gürcüstan və Türkiyəyə nəql olunur. Qaz alıcısı qismində Azərbaycan da çıxış edir.