Azərbaycan, Bakı, 29 mart / Trend , müxbir E.İsmayılov/
Hazırda ARDNŞ (Azərbaycan Respublikası Dövlət Neft Şirkəti) Xəzər dənizinin Azərbaycan sektorundakı "Azəri-Çıraq-Günəşli" dəniz yataqları blokunun və "Şahdəniz" qaz-kondensat yatağının işlənməsi layihələri çərçivəsində sutkada 15-16 milyon kubmetr qaz əldə edir. Bu barədə bazar ertəsi neft-qaz bazarındakı mənbə bildirib.
Mənbənin sözlərinə görə, ARDNŞ, xüsusilə də "Şahdəniz" yatağından sutkada 7 milyon kubmetr qaz əldə edir.
"Şahdəniz" yatağının işlənməsinə dair müqavilə 1996-cı il iyunun 4-də imzalanıb. Layihə iştirakçıları bunlardır: BP (operator) - 25,5 faiz, "Statoil Hydro" - 25,5 faiz, NICO - 10 faiz, "Total" - 10 faiz, "LukAgip" - 10 faiz, TPAO - 9 faiz, ARDNŞ - 10 faiz.
Hazırda qaz Cənubi Qafqaz qaz kəməri ilə Gürcüstan və Türkiyəyə nəql olunur.
Bu il yataqdan 7,84 milyard kubmetr qaz hasil etmək planlaşdırılıb. Yataqda ən yüksək həcmdə istehsal 8,6-9 milyard kubmetr qaz həcmində nəzərdə tutulur. Ümumilikdə, ikinci mərhələ çərçivəsində illik 20 milyard kubmetrə qədər qaz hasil edilməsi planlaşdırılır.
Mənbənin sözlərinə görə, ARDNŞ həmçinin Xəzər dənizinin Azərbaycan sektorundakı "Azəri-Çıraq-Günəşli" dəniz yataqları blokundan sutkada 8-9 milyon kubmetr səmt qazı əldə edir.
"Azəri-Çıraq-Günəşli" layihəsi üzrə birgə işləmə və hasilatın pay bölgüsü barədə saziş 1994-cü ilin sentyabrında imzalanıb. Müqavilənin fəaliyyət müddəti 30 ildir.
"Azəri-Çıraq-Günəşli" yataqlar blokunun səhmdarları bunlardır: ВР (operator - 34,1%), Chevron (10,2%), ARDNŞ (10%), INPEX (10%), StatoilHydro (8,6%), ExxonMobil (8%), TRAO (6,8%), Devon (5,6%), ITOCHU (3,9%), Hess (2,7%).
