Gürcüstan, Tbilisi, 11 may /Trend, müxbir N.Kirsxaliya/
Azərbaycan, Gürcüstan və Rumıniya Avropaya maye qazın nəqli layihəsinin həyata keçirilməsi üzrə müştərək şirkətin yaradılması məsələsini nəzərdən keçirirlər. Bu barədə çərşənbə günü Gürcüstanın Energetika Nazirliyindən bildirilib.
Mayın 12-də Tbilisidə nazirlər səviyyəsində Avropaya Azərbaycanın maye qazının ixracı üzrə Azərbaycan-Gürcüstan-Rumıniya" layihəsinin həyata keçirilməsi məsələlərinə dair konfrans keçiriləcək.
"Konfransda Azərbaycanın və Gürcüstanın energetika nazirləri Natiq Əliyev və Aleksandr Xetaquri və Rumıniyanın iqtisadiyyat, ticarət və biznes naziri Adrean Vidianu iştirak edəcəklər", - Trend-ə Gürcüstanın Energetika Nazirliyində məlumat verilib.
Tərəflər Buxarestdə aprelin 13-də üç ölkə tərəfindən imzalanmış memorandumun həyata keçirilməsi məsələsini müzakirə edəcəklər. Memorandum Azərbaycandan maye qazın Gürcüstan ərazisindən keçmək şərtilə Rumıniyaya ixracını və bu məqsədlə Gürcüstan və Rumıniyada maye qaz istehsal edən iki terminalın tikilməsini nəzərdə tutur.
Layihə Azərbaycan qazının Gürcüstanın Qara dəniz sahillərində qaz kəmərləri vasitəsilə nəqlini və orada xüsusi terminalda mayeləşdirilməsi və bundan sonra tankerlərlə Rumıniyanın Konstansa limanındakı terminala çatdırılmasını nəzərdə tutur. Sonra maye qaz təbii qaz halına salınacaq və ölkə ərazisində mövcud olan qaz infrastrukturlarından istifadə etməklə Rumıniya və digər Avropa ölkələrinin tələbatının təmin edilməsinə yönəldiləcək.
Memoranduma əsasən, tərəflər "Cənub dəhlizi" çərçivəsində Xəzər regionu və Avropanı birləşdirən energetika tranziti dəhlizinin inkişafına dair niyyətlərini bildiriblər, qaz ticarəti və Rumıniyanın yeraltı qazsaxlama anbarlarından istifadə, həmçinin energetika sahəsində fəaliyyət göstərən müvafiq strukturlar arasındakı əməkdaşlığın genişləndirilməsi imkanlarının araşdırılmasına dair qərar qəbul edilib. "Azerbaijan-Georgia-Romania Interconnector" layihəsinin texniki-iqtisadi əsaslandırılmasının hazırlanması və texniki, texnoloji, maliyyə və hüquqi aspektlərinin müəyyən edilməsi məqsədilə Buxarestdə şirkət yaratmağa dair Rumıniya tərəfindən qərar qəbul edilib.
