Аzərbaycan, Bakı, 14 may /Trend, müxbir E.İsmayılov/
Əvvəlcə verilmiş məlumata görə, yanvar-aprel ayları ərzində SOCAR Gas Supply (Azərbaycan Respublikası Dövlət Neft Şirkətinin törəmə müəssisəsi) Gürcüstana yanvar-mart ayları ilə müqayisədə (340 mln kubmetr) 398 mln kubmetr "sosial" qaz satıb. Bu barədə cümə günü SOCAR Energy Georgiadakı mənbə bildirib.
Onun sözlərinə görə, aprel ayında Gürcüstan bazarına SOCAR Gas Supply 58 mln kubmetr qaz satıb.
2009-cu ildə SOCAR Gas Supply Gürcüstana 800 mln.kubmetrdən çox "sosial" qaz satıb.
ARDNŞ və Gürcüstan hökuməti 2008-ci ildə Gürcüstanın Kaxetiya, Mçxeta-Mtianeti, Şido və Kvemo-Kartli, Acarıstan, Quriya, İmereti, Sameqrelo kimi regionlarını əhatə edən 30 qazpaylayıcı təsərrüfat və şəbəkələrin idarəsi məsələsi haqqında saziş imzalayıblar. Həmçinin beş il ərzində qazın satışı və onun Gürcüstanın müəyyən orqanları və sosial abunəçilər qrupu üçün bu müddət ərzində qiymətlərin dəyişilməməsi haqqında müqavilə imzalanıb. Paylayıcı şəbəkələr ARDNŞ-nin idarəçiliyinə 2009-cu ilin fevral ayında verilib.
2009-cu ilin aprel ayında SOCAR Energy Georgia azərbaycanlıların sıx yaşadığı Gürcüstanın Marneuli rayonunda qazpaylayıcı şəbəkələrin istifadəsini əldə edib.
SOCAR Energy Georgia ARDNŞ-nin törəmə şirkətidir və Gürcüstanda neft və neft məhsullarının paylanması və marketinqi ilə məşğul olur. Şirkət Gürcüstan bazarında neft məhsulları və qaz satır. SOCAR Georgia-nın həmtəsisçiləri bunlardır: ARDNŞ - 51 faiz, Petro-Trans FZCO - 24,5 faiz və Vano Çxartişvili - 24,5 faiz.