Türkmənistan, Aşqabad, 17 iyun /Trend, H.Həsənov/
"Türkmənqaz" Dövlət Konserni və İranın Milli Qaz Şirkəti türkmən təbii qazının İrana tədarük edilməsi barədə mövcud müqavilə üzrə əlavə razılaşma bağlayıblar, - rəsmi türkmən mənbəsi məlumat verib.
İran tərəfdən sənədi şirkətin icraçı-direktoru Cavad Ouci imzalayıb. Sənədə əsasən, cari ilin əvvəlində Türkmənistanın "Dövlətabad" yatağından İranın Xangeran ərazisinədək ikinci qaz kəmərinin işə salınması üzrə iranlı istehlakçılara əlavə təbii qaz həcminin göndərilməsi planlaşdırılır.
Bu məqsədlə gələcəkdə həcmin artırılma perspektivi nəzərə alınmaqla, türkmən qazının əlavə alış-satışı üzrə müqavilə layihəsinin hazırlanması üçün ekspertlərin hökumətlərarası qiymətləndirilməsi keçiriləcək.
Razılaşmanın imzalanması mərasimində dünən ölkə Prezidenti Qurbanqulu Berdıməhəmmədovun qəbul etdiyi İranın neft naziri Səid Məsud Mirkazimi iştirak edib.
Türkmən hökumətinin mətbuat xidmətinin verdiyi məlumata görə, "Türkmənistan və İranın qarşılıqlı maraqlarına cavab verən, xüsusilə də neft-qaz sahəsində faydalı tərəfdaşlıq üzrə kifayət qədər toplanan təcrübəyə əsasən, dialoqu davam etdirmək barədə hər iki tərəfin niyyəti bildirilib".
"Mehriban qonşuluq və geniş beynəlxalq tərəfdaşlıq siyasəti yürüdən Türkmənistan, bundan sonra da ənənəvi Türkmənistan - İran tərəfdaşlığını möhkəmləndirmək əzmindədir", - türkmən rəhbəri deyib.